Den opinion di Inspector di Salubridad: Dokter di cas a faya garafal cu paciènte cu tabatin ambei

WILLEMSTAD – Inspector di Salubridad tabatin critica devastador contra un dokter di cas (femenino) kende a basilá y rèk tratamento di un caso medico caminda e mester tabata mucho mas pro-activo.

Como resultado di e actuacion deficiente di e dokter di cas, e homber a pasa un caminda di cruz na man di dokter local, SEHOS y hospital na Venezuela caminda nan a operé.

 

Inspector a censurá e hecho cu e dokter di cas fo’i promé biaha cu el a mira e paciènte, a constatá cu e tin un caso serio di ambei.

Sinembargo el a scoge pa aplicá un tratamento conservativo loke no por reclamá e dokter.

Pero ora nota cuanto biaha e paciènte mester a bay su dokter di cas dia tras di otro y mirando cu e tratamentu no ta dunando resultado maske cuanto angua di anestesia e dokter pasé, Inspector ta haña cu e mester a duna un tratamento mas agresivo.

En todo caso e dokter di cas mester a mandé sikiera un specialista y no laga e homber mes bay busca alivio na SEHOS.

 

E dokter di cas a faya caminda el a papia cu e specialista na telefon, pero no a manda e paciènte pe specialista.

Inspector a tuma e dokter masha na malo cu despues di a trata e homber 9 dia sin mira progreso, e no a mandé specialista.

Loke e mester a haci ta papia cu e specialista y anotá ki ta pasando p’e homber bay specialista.

 

Inspector a splica tambe cu ta ‘Instruccion’ tin riba e punto aki: Practicamente el a laga e homber mes busca manera pa cura.

Sikiera asina e dokter a cumpli cu su deber pa duna cuido profesional. Pa colmo e dokter no a documentá cuanto inyeccion el a pasa e homber.

Su forma di proceder ta laga hopi di deseá, pasobra ta deber profesional di un medico p’e forma un archivo adecuado cu semper e por cay bèk riba di e den caso di duda.

Leave a Reply

Top