Den ultimo 2 aña mas di 3 mil hende a ser nenga entrada na Aruba

Den e ultimo aña a mira, compara cu 20 aña pasa, ta cu semper tabatin un problema cu ilegalidad na Aruba. Semper tabatin un tempo cu nan ta drenta.

Antes tabata Colombiano y awor ta mira cu e cifra ta mucho mas Venezolano.

“N’e momentonan aki a prohibi entrada na Aruba — den e ultimo dos añanan — mas di 3000 persona a wordo nenga pa drenta manera cu nan yega Aeropuerto y mas cu 1200 persona ilegal a keda deteni den e ultimo dos añanan.

Aña 2016 nos tabata riba 800 y si mira e grupo mas grandi t’esun mas cerca di nos frontera, Venezuela.

Esey no ta nifica cu t’e unico lugar di unda ilegalnan ta bin for di dje, pero ta nifica si cu e retonan cu nos tin cada bes ta bira mas grandi pa percura p’e hendenan aki no keda aki,” Minister di Husticia, mr. drs. Arthur Dowers ta acentua.
“Nos a duna un señal hopi cla algun siman pasa cu nos kier menos hende bin Aruba y keda ilegal. Nos a reduci e riesgonan caba introduciendo e carta di garantia.

Nos ta percura cu si bo no cumpli cu e rekisitonan financiero bo no ta drenta. Pero tin cu tene na mente cu e hecho cu e problema social economico grandi na nos frontera cu pais bisiña ta conduci cu mester keda cumpli cune diariamente,” Dowers a agrega.

 

E ta sigui splica cu tin limitacion di cupo, pasobra tin diferente cel, pero no ta bay ta suficiente si mira cuanto hende ta gara riba un dia… “mi ta mira tog cu esaki ta un comienso hopi valioso pa haci e trabao y mas cu tur cos por trata e hendenan na un forma humano y segun e tratadoan cu nos mester tene nos mes na dje.”

Den e facilidadnan nobo, e “Vreemdelingendetentie” por acomoda casi 40 persona. Esey kiermen cu si por deporta e hendenan aki hopi liher hayando e cooperacion e ora por sigui draai.

 

“E problema cu mester tene cuenta cune ta cu e cuponan ta depende si tin muher of homber.

Si bo tin un muher e ora ey bo capacidad ta baha, pasobra bo nor por ubica homber cu muher den un cel solamente si e ta un famia,” e ta splica.

Esaki ta depende di e cantidad di hende cu gara y e por limita e posibilidad di ubica hende hunto pero pa esaki tin basta cel cu por traha cune.

Minister Arthur Dowers ta sigui bisa cu e ta depende di unda un persona ta bin.

 

Si un hende ta bin di un pais hopi serca e ta mas facil pa por deporta basta cu nan coopera, pasobra tin momentonan cu un persona no ta coopera pa trece su pasporte.

“Si e no trece su documentonan di biaha e ora e ta bira mas dificil pa nos deport’e, pero mayoria biaha nan ta coopera dunando nan documentonan.

Si un persona tin medionan financiero e ora nan ta sali riba nan mesun costo. Si nan no tin esey ta nifica cu Gobierno mester paga pa nan bay. Esey ta tuma lugar tambe ya cu nos tin presupuesto p’e.

 

Tin biaha e ta costa hopi placa depende di unda nan ta bin. Venezuela ta hopi facil, pero si ta Filipinas of China e ta un proceso mas complica y ta costa hopi mas placa,” Minister Dowers a elabora.

E ta sigui bisa cu un di e retonan grandi ta Cuba. Si nan tin hopi tempo aki como ilegal ta bira casi imposibel pa por saca nan.

“Esey ta retonan grandi cu nos ta confronta. Nos ta den combersacion pa mira si por limita e riesgonan di personanan cu ta bin di Cuba.

E grupo di mas grandi ta bin di nos frontera y t’esun cu nos ta saca mas liher tambe,” Dowers ta conclui.

 

 

Top