Den veredicto carambòl…..Gobierno di Pais Corsou tin derecho di cobra Opcenten

WILLEMSTAD – Den un caso caminda un ciudadano a bay den apelacion contra e hecho cu ta un Huez stacioná na Aruba a trata y tuma decision den un caso cu e tabatin riba asunto belasting, Corte di Husticia Comun a probechá pa aclareá un punto riba cual sa tin hopi discusion.

Gobierno di Corsou debidamente tin derecho pa cobra Opcenten riba Aanslag di Belasting, pasobra tur ordenansa di Teritorio Insular di Corsou automaticamente a bira Ordenansa di Pais Corsou dia 10-10-10.

For di 10-10-10 Corsou tin base legal pa cobra Opcenten riba p.e. Grondbelasting. Esey ta perfectamente legal reglá.

 

Es más, tur tribunal den promé instancia por dicta veredicto y sentencia cu ta valido riba tur isla di BES y paisnan autónomo manera Corsou y Aruba.

Esey ta posibel, pasobra for di 1 januari 2016 tur Huez ta miembro di Corte Comun y ta encargá pa atendé casonan di belasting.

Den e caso aki ciudadano a reclamá cu den su caso e griffier no a firma e veredicto, pero esey no ta kita nada cu e decision ta legal.

 

For di 10 òctober 2010 e ordenansa riba cobransa di Opcenten pa Grondbelasting a keda na vigor igual cu e tabata promé cu 10-10-10.

Cu otro palabra, Eilandsverordening a bira Landsverordening. E detaye aki a bin dilanti den e caso di un ciudadano contra Inspector di Belasting, kende no tabata di acuerdo cu un aanslag di Grondbelasting cu Inspektie di Belasting a saca dia 12 di sèptèmber.

E ciudadano a apelá, pero Inspector automaticamente ta rechasa e apelacion. El a bay Corte y aki tambe el a pèrdè e caso.

E ciudadano ta doño di un cas y Belasting a manda cobré NAf 720 riba aña 2013 plus 108 florin, pasobra nan a balotá su cas riba 240.000 florin.

 

HUEZNAN ‘RUBIANO’

Loke no a cay bon serca e ciudadano ta cu ta tres Huez ‘Arubiano’ pero cu ta Hueznan cu ta biba y traha na Aruba a tuma decision den e caso.

Ta trata di Hueznan De Werd, Winfield y tur ta miembro di Corte Comun di Husticia di Aruba, Corsou y St. Maarten y di islanan BES.

 

E ciudadano te mes a apelá nan veredicto tambe pasobra e kier sa si e tribunal di tres di Aruba tabatin autoridad pa tuma decision.

Tambe cu si mester a tene cuenta cu e argumentonan di Inspector, pasobra el a entregá nan lat y si e Inspector tabata competente pa manda aanslag.

Y finalmente, cu si Inspector di Belasting di Corsou ta autorisá pa cobra Opcenten.

E ciudadano ta insisti cu Pais Corsou no tin derecho legal pa cobra Opcenten, pero Inspector a manda bisa cu e suma ta corecto.

 

Fo’i promé instancia Corte a bisa cu e aanslag tabata perfectamente legal, pasobra Inspector ta fiha e suma di belasting y ta encargá Ontvanger pa cobra esaki. No ta Ontvanger ta fiha e suma cu mester paga sino te Inspector. Cu otro palabra e cabayero a pèrdè riba tur punto.

Leave a Reply

Top