Den vision 17-21 di POR: Den e prome 100 dianan di gobernacion POR lo presenta un decision pa un solucion definitivo pa dump na Parkietenbos

Mirando e impacto grandi y negativo riba salud publico, medio ambiente y turismo, dentro di 100 dia cu asumi responsabilidad gubernamental, POR lo dicidi un solucion definitivo pa dump na Parkietenbos. Esaki dor di duna preferencia na companianan local y tecnologia moderno y proba di reciclahe y di converti sushi den energia. Esaki ta vision di POR pa e periodo di gobernacion 2017 – 2021.

 

POR su meta ta pa duna prioridad na proteccion mas estricto y mehoracion di calidad di nos naturalesa y medio ambiente a base di un plan integral. Den e cuadro aki POR ta enfoca riba mehoracion di e cuadro legislativo y implementacion di un maneho integral (natuurbeleidsplan).

Tambe mehoracion di control y sancion, conscientisacion di comunidad, solucion pa e problematica di dump na Parkietenbos y tur otro dumpnan ilegal, establece un Parke Marino, proteccion y restauracion di nos flora y fauna, promove energia alternativo y mehora e relacion cu instancianan no-gubernamental.

 

POR ta di opinion cu un di e prioridadnan den e prome lunanan di gobernacion ta pa, bin cu un maneho di zero tolerancia pa loke ta dumpmento di sushi ilegal. Mester elimina tur e dumpnan aki, mehora control y bin cu sancion pisa pa esnan cu ta comete infraccion.

 

Por lo percura pa implementacion di un ordenansa di proteccion di naturalesa pa di e forma ey autoridadnan competente por cumpli mas efectivamente cu e obhetivo pa proteha naturalesa. Ademas lo haci esfuerso pa finalisa, aproba y implementa un plan di maneho integral di naturalesa y medio ambiente den consulta estrecho cu tur stakeholder.

Tambe lo percura pa ancra den ley tratadonan internacional, manera e. o. e convencion “Ramsar”.

 

Cu e meta pa adverti y descurasha esnan cu ta comete infraccion contra nos leynan riba tereno di naturalesa y medio ambiente, lo intensifica trabounan di control y na mesun momento lo aplica sancionnan severo contra tur compania y persona cu ta haci daño na nos naturalesa y medio ambiente, tanto riba tera como den lama.

Ademas lo reforsa e seccion di Inspeccion di Departamentonan di Naturalesa y Medio Ambiente (DNM) y Bureau City Inspector.

 

Conscientisacion di comunidad tambe ta sumamente importante. Den e proximo periodo di gobernacion, lo conscientisa comunidad pa medio di campañanan educativo na scolnan como tambe den espacio publico riba diferente tema cu tin di haber cu medio ambiente.

  1. e. reciclahe y uzo di energia consciente. Lo inclui conocemento di nos herencia natural, flora y fauna, agricultura y pesca den curiculo di scol.

Promocion di uzo di transporte publico pa reduci uzo di auto priva y stimula uzo di material degradabel, tambe mester forma parti di maneho di Gobierno pa proteha nos medio ambiente.

Un publico bon informa ta na altura tambe di kico tur ta prohibi a base di nos leynan ambiental y ta haya e estimulo tambe pa ta alerta y pa entrega keho cerca e instancianan concerni ora constata infraccion.

Top