Departamento di Aduana a celebra cu un grupo grandi di funcionarionan cu diferente ceremonia

Diabierna ultimo, Gerencia di Departamento di Aduana conhuntamente cu Minister di Finansa, sr. Angel Bermudez, Staf, sindicato SADA y demas empleadonan a celebra cu un grupo grandi di empleadonan di Aduana den un ceremonia di huramentacion, entregamento di diploma na tur esnan cu a termina e opleiding di Hoofdkommies der invoerrechten en accijnzen (I&A) exitosamente, hubilarionan cu a cumpli 25 aña di servicio y promocion. Cu otro palabra Departamento di Aduana tabata den pleno celebracion.

 

E ceremonia a cuminsa cu huramentacion di 17 empleado tanto funcionarionan di Aduana como empleadonan den e ramo administrativo. Despues a continua cu e entregamento di diploma na funcionarionan di Aduana cu a termina nan opleiding exitosamente.

Tambe e hubilarionan cu a cumpli 25 aña di servicio den Cuerpo di Aduana a ricibi nan decreto Gubernamental.

 

Director di Departamento di Aduana y Minister di Finansa a gradici e grupo di funcionarionan di e Cuerpo di Aduana pa nan dedicacion y servicio na nos comunidad alabes a encurasha e grupo di Hoofdkommiezen pa nan sigui haci nan best pa sigui crece den nan carera y a recorda e funcionarionan cu a huramenta kico nan compromiso y contribucion ta tanto pa Departamento di Aduana como tambe nan huramento y promesa como empleado publico.

 

Banda di e huramentacion, entregamento di diploma y felisitando e hubilarionan tabatin varios otro promocion. Sra. Carondina Leijdekkers a ricibi su decreto Gubernamental y insignes cu ta coresponde den e rango di Adjunct Inspecteur der I&A.

Sr. Paul Vandormael tambe ta oficialmente den servicio di Cuerpo di Aduana den e funcion como “Comptroller” y durante e ceremonia sr. Vandormael a ricibi su decreto Gubernamental pa cu esaki. Sra. Jeanella Dubero a wordo promovi pa e funcion di Klerk 1ste klasse y a ricibi su decreto Gubernamental pa cu e funcion menciona.

Top