Departamento di Aduana a entrega certificado na 10 cursista di e Verificateursopleiding

Departamento di Aduana a haci entrega di e prome certificado di e Verificateursopleiding na e 10 cursistanan cu ta hasiendo e curso intensivo aki na Universidad di Aruba.

E ceremonia a tuma lugar na Universidad di Aruba, den compania di miembronan di Management Team, cursistanan y nan ser keri, sr. Nic Quandus Opleidingshoofd, sra. Patricia Flanders-Illes Secretaria di e opleiding, sr. Paul Vandormael Coordinador di e opleidingen na DAA y docentenan.

 

Director di Aduana sr. Roderick Croes, Minister di Finansas sr. Angel Bermudez y diferente representante a duna palabra durante e ceremonia. Den su discurso director di Aduana a refleha con antes miembronan di Cuerpo di Aduana tabata biaha pa Hulanda pa specialisa nan mes. Candidatonan cu ta bin na remarke pa bay haci e curso aki ta pasa dor di un proceso extenso. Sr. Croes a sigui splica di e bentaha y desbentahanan ora cu bo ta haci e curso na tera frio en comparacion cu si bo haci e curso aki na Aruba.

Na Hulanda e candidatonan tin di adapta nan mes na e clima, e omgeving, ta leu di nan sernan keri, pero na e otro banda nan tin mas tempo y menos distraccion pa concentranan mes mas riba nan estudio.

Na november 2015, e Kommies Verificateurs a haya e oportunidad di haci e curso aki na Aruba, unda cu nan ta den nan seno familiar, e dushi clima di Aruba y nan bekende omgeving.

 

Sr. Croes duna di conoce cu den e esfuerso pa hiba e organisacion Aduana dilanti ta necesario pa sigui inverti den modernisacion di procesonan y leynan pero tambe inverti den e “human capital” di e organisacion significando cu lo tin di sigui inverti pa “upgrade” e conocemento y abilidadnan di su hendenan. E meta di e Verificateursopleiding ta pa e organisacion di Departamento di Aduana por sigui evoluciona di un organisacion cu den pasado conoce mas tanto controlnan fisico y aworaki den presente y den futuro lo bay den direccion di traha mas a base di Risk Management y haci mas controlnan administrativo.

 

Cursistanan cu ta termina e curso di Verificateur, no solamente lo subi di rango, pero lo bay haci trabounan den e funcion como specialista (HBO niveau) riba tereno administrativo a base di risico. E organisacion di Departamento di Aduana sigur lo wordo reforsa cu 10 especialista mas riba nivel halto.

Di e 10 cursistanan cu a finalisa e prome parti di e Verificateursopleiding cu exito tin 8 damas y 2 cabayero. E best gelaagden di e parti basico di e curso ta: sra. Marilyn Webb, sra. Maribel Nuboer y sra. Deyanira Tromp-Ras.

Un felicitacion enorme pa nan esfuerso ta bay na: sr. Edgard Croes, sra. Anna Cristina Croes-Gonzalez, sra. Sharina van der Biezen-Hernandez, sra. Angeli Nuboer, sra. Mildred Franken-Peña, sra. Deyanira Ras, sra. Eliane Riley, sra. Ivette Semerel, sr. Enrico Soto y sra. Marilyn Webb.

 

Un gradecimento ta bay na Director di Aduana, Minister di Finansa, Universidad di Aruba, Hoofd, Secretaris, Adviseur, Coordinador y Docentenanan di e Verficateursopleiding tanto na Aruba y BCKC. Un gradecimento inmenso ta bay na tur Cursistanan y nan famianan pa tur nan esfuersonan y sosten. Tambe na e afdeling Algemene Zaken y demas empleadonan cu a duna un nan aporte pa cu e curso aki.

Gerencia, staf y empleadonan di Departamento di Aduana ta desea tur cursistanan hopi exito y perseverancia den nan tareanan y animo pa sigui crece den nan carera.

Top