Departamento di Aduana Aruba su controlnan administrativo despues di importacion tin resultado impactante

Departamento di Aduana ta informa cu na comienso di aña a cambia e sistema di haci control. Durante e prome mitar di aña a haci 2 control grandi.

E controlnan administrativo aki ta yama CNI “Controle na Invoer”. E controlnan administrativo ta sosode despues cu e mercancia a wordo importa caba.

 

PROCESO DI E CONTROL ADMINISTRATIVO DESPUES DI IMPORTACION

Control administrativo ta constisti dor di compara e informacion cu e cliente ta hinca den nos sistema “Asycuda” cu locual e cliente ta hinca den su mesun administracion.

Conforme ley, Douane tin e autoridad pa pidi y haña informacion for di e administracion di clientenan.

Na momento cu Douane, haciendo su controlnan, bin constata cu tin fout den calculacion, esaki lo wordo regla dor di haci un coreccion den e declaracion. E cliente lo ricibi un cobransa adicional p’e por paga e diferencia.

 

Den caso cu durante un control Douane constata cu a haci uso di factura falso y/of a constata cu tin producto cu no a wordo declara na momento di importacion e ora ey e cliente lo wordo persigui penalmente.

Esaki ta nifica cu banda di e cobransa adicional di e coreccion den e declaracion tambe lo wordo agrega un transaccion den forma di un multa.

Den caso cu no paga e multa y e corecion den e declaracion, e caso por bay Corte cu tur  consecuencianan cu esaki por trece cu ne p’e cliente.

 

E suma di e multa ta keda completamente den man di Ministerio Publico.

Na comienso di 2017 Departamento di Aduana a cuminsa cu 3 caso (3 diferente cliente). Di cual uno ta completamente cla y e resultado ta lo siguiente:

Coreccion den declaracion di 250.000 florin; Multa proponi dor di Ministerio Publico di casi 1/2 miyon florin

E di 2 y di 3 caso ta bayendo den mesun direccion cu lo trece e mesun consecuencianan cu e prome caso.

 

E controlnan na Departamento di Aduana lo continua di mesun manera cu a wordo menciona anteriormente. Dentro di poco otro companianan lo ricibi un anuncio cu nan lo ricibi un bishita di Douane pa cu e controlnan aki.

P’e motibo aki ta hopi importante pa tur companía haci nan declaracionnan conforme ley usando factura y balornan corecto p’asina nan no haña nan mes cu sorpresa. Pasobra e sorpresa por sali nan hopi caro.

 

 

Top