Departamento di Salud Publico aplicando reglanan Europeo ta controlando tur carni procedente di Brazil

Desde siman pasa mundo henter ta riba un alerta, despues cu autoridadnan Brazilero a descubri cu algun compania tabata uza carni daña, paketa nan di nobo y bolbe bendenan comosifuera nan ta fresco y nobo.

Mescos cu “Nederlandse Voedsel- en Warenautoriteit” di Hulanda, aki na Aruba tambe Servicio Veterinario di Departamento di Salud Publico Aruba (DVG) tambe a activa mesora y ta aplica 100% control visibel riba tur carni di e pais Latino Americano.
Mester menciona cu na Aruba mayoria carni ta procedente di Argentina y for di Merca, pero un parti tambe ta bin di Brazil.
Pa evita cu ta crea panico innecesario, ta bon pa aclaria cu ta 4 compania ta wordo sospecha di e practica aki. Pues ta cuestion di verifica di unda e carni ta bin, di cua compania, di cua “slachthuis” y verifica e number di e carga. Ora un di e informacionnan aki no ta cuadra, ta prohibi entrada di e carni na Aruba. Ya caba a prohibi un container cu ta den ruta pa nos isla, cu no lo permiti drenta mercado.
Departamento di Salud Publico Aruba ta den contacto estrecho cu nan coleganan di Hulanda pa asina garantisa cu aki tambe ta aplica e mesun reglanan cu Hulanda y cu ta aplicando den paisnan miembro di Union Europeo. E reglanan ta mas estricto pero ta pa garantisa cu solamente carni di calidad ta yega e paisnan aki.

 

Documentonan oficial den archivo di Gobierno di Aruba ta mustra cu e aña aki Departamento di Salud Publico Aruba ta celebra 100 aña di existencia! A cuminsa cu un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento. Awendia DVG ta consisti di 82 funcion den e departamento y ta cambia di un “Uitvoerende Dienst” pa un “Beleids Directie”. Ta e meta pa DVG fungi como e parti central den cuido na Aruba, conectando tur otro stakeholdernan. E departamento mester demostra profesionalismo, dinamismo y etica halto den tur trabou cu nan ta desplega.

 

Directie Volksgezondheid ta situa den Caya Ing. Roland Lacle, parti den 6 edificio banda di otro y 2 otro edificio situa na Barcadera, unda tin Servicio Veterinario y GKMB. Na tur e departamento ta conta cu 170 empleado bon prepara y capaz pa sigui desaroya e organisacion pa implementa y ehecuta maneho riba tereno di salud publico na nos isla.

Top