Departamento di Social Work & Development a haya bishita di University of South Carolina

Entre 3 di maart te cu 11 di maart diferente studiante y docente di University of South Carolina (USC) a bishita Aruba pa conoce aspectonan social, cultural y educativo cu a wordo organisa door di e programa Social Work and Development di Universidad di Aruba.

 

E iniciativa aki a cuminsa aña pasa unda cu a bin cu un acuerdo pa e dos programanan di Social Work colabora den areanan di intercambio internacional entre studiantenan y docentenan.

E meta principal ta pa crece profesionalmente por medio di diferente tayer, observacionnan den klas, etc. E intencion di esaki ta pa yuda otro den e mehoracion di e calidad di enseñansa di cada programa.

Ademas, mirando cu tur dos programa ta cumpli cu normanan internacional di educacion avansa, nan lo por sostene otro den diferente area di nan programa y specialmente den preparacion pa bishitanan den futuro di organisacionnan di acreditacion.

 

Asina a cuminsa cu un bishita educativo, unda cu studiantenan di USC a conoce Aruba no solamente den e areanan turistico pero tambe den e areanan social y cultural.

Asina por pensa riba bishita den bario di Rancho y San Nicolas, conoce Imeldahof, Stichting Reclassering, FAVI, IPA, Cruz Cora Aruba, Heart Centered Leadership Foundation, Brenchie’s lab, Parke Arikok, Museum of Industry y Aruba Aloe.

 

Ademas di esaki, studiantenan a conoce y a tuma parti na modulonan di Universidad di Aruba y na Aruba doet. Na final di e bishita docentenan a sinta hunto y papia riba posibel areanan cu por agrega na e colaboracion existente y con pa sigui cu e experiencia fructifero aki.

Den futuro University of South Carolina conhuntamente cu Universidad di Aruba, specialmente e departamento di Social Work and Development lo sigui colabora cu bishitanan similar pa studiantenan local y studiantenan di USC.

Nos kier a gradici tur instancia cu a duna nan aporte y tempo na e bishita aki. Esaki tabata un bunita oportunidad pa celebra Dia Internacional di Trabou Social 2017.

 

Pa mas informacion di nos estudio por sigui nos pagina di Facebook: Social Work and Development – University of Aruba of nos website www.ua.aw.

Top