Depende di e proceso di registracion di e avion, Divi Divi Air ta cla pa bula pa Aruba

E siman aki, e avion nobo di Divi Divi Air a baha pa prome biaha na Hato, Corsou y a ser recibi cu tur ceremonia corespondiente. Ta trata aki di un avion Havilland DHC-6-300 (Twin Otter) y ta intencion di e compania pa cuminsa bula pa Aruba tambe.

Di e forma aki, por bisa cu Divi Divi Air tambe ta uni su mes n’e competencia cu tin, pasobra te awor ta InselAir so tabata dunando servicio n’e islanan ABC, pero pagando un tarifa masha halto, pasobra no tin otro.

 

Siman benidero, Aruba Airlines no cuminsa bula pa Corsou, sigui pa Bonaire, mientras cu Divi Divi Air tambe a anuncia di lo bula mesun ruta aki, unabes cu e proceso di registracion di e avion ta cla.

Esaki ta mesun tipo di avion cu Windward Island Airways (Winair) ta bulando entre islanan ariba.

 

Divi Divi tin dia 1 di november awor como e fecha pa cuminsa bula pa Aruba. Actualmente Divi Divi ta bulando minimo 6 buelo pa siman entre Corsou y Bonaire.

E avion aki tin un capacidad di 19 pasahero, pa cual sigur tin demanda. Divi Divi ta un compania cu a ser funda na 2000 y t’e mihor conexion aereo cu tin entre Corsou y Bonaire y proximamente pa Aruba tambe.

 

Manera menciona, banda di InselAir, dia 25 awor Aruba Airlines lo cuminsa duna servicio riba mesun rutanan aki, pero no lubida cu recientemente Corte a anula e bancarota di Tiara Air, cu ta pensa atrobe di bula entre e islanan ABC y pa Venezuela. Pues conexion lo tin suficiente, loke sigur mester yuda den baha e tarifa cu tin aworaki.

 

Top