Deportivo Nacional a celebra victoria cu Minister Schwengle

Minister di Salud Publico, Cuido di Nos Grandinan y Deporte, Dr. Carlos “Alex” Schwengle a topa diabierna anochi cu e team campeon di Division Honor, esta Deportivo Nacional, na Marina Pirata Restaurant. Durante e anochi hungadonan, dirigente, representantenan di Directivanan di Lotto pa Deporte, ASU, COA, FFD y AVB a pasa un anochi ameno.

 

Mr. Di-Stefano Wernet di Fundacion Lotto pa Deporte a habri e anochi gradiciendo tur presente y a felicita e team pa nan logro despues di 10 aña, pa bay cas cu e titulo maximo den futbol. Minister Schwengle tabata contento y orguyoso di a mira con leu e team a yega.

 

Presidente di AVB, Ing. Richard Dijkhoff a yama pabien na Deportivo Nacional y tabata contento di por a pasa un rato cu nan. President di Deportivo Nacional Silo Brete a ricibi for di Minister Schwengle un T-shirt cu informacion di ta e team ganado di e aña aki, tambe a entreg’e un cuadra di recuerdo.

 

Richard Dijkhoff a entrega na Gerardo de Veer un cuadra di recuerdo unda el a saca potret cu Presidente di FIFA y Presidente di CONCACAF, durante nan ultimo bishita historico na Aruba. Gerardo de Veer ta un sostene fiel di Deportivo Nacional pero den su rol tambe na MetaCorp a patrocina hopi otro ekipo di futbol riba nos isla.

 

Minister dr. Alex Schwengle a saca potret cu e team y tabata contento di e oportunidad di a sinta cu e team y celebra hunto cu nan e victoria den liga di division di honor.

Top