Derame di petroleo na Refineria Amuay, Estado Falcon, – Por tin consecuencia pa Aruba?

Departamento di Calamidad no por duna informacion ainda

 

FALCON, VENEZUELA: Un di e tankinan den cual ta deposita restonan di crudo, di e refineria mas grandi di Venezuela Amuay, a bay over y a basha bay den e bahia cu ta keda serca di e refineria.

Varios tankero y boto tambe a keda mancha na petroleo, asina dos trahador y un lider sindical a duna di conoce.

 

E derame di e pos a wordo ocasiona pa dos dia tras di otro di yobidanan hopi fuerte y tambe pa falta di mantencion di e refineria. Esaki e representante di e trahadornan Ivan Freites a duna di conoce.

E tankeronan mancha na crudo, no ta wordo permiti pa nabega den awanan internacional, paso nan por genera contaminacion.

Ni PDVSA, ni Minsterio Petrolero no ta dunando informacionnan cu a wordo pidi.

 

Ivan Freites a bisa, cu te n’e momento aki no ta conoci cuanto crudo a bay perdi, pero mas sigur ta trata den careda di un 200 mil bari di crudo, tambe el a confirma cu tin botonan tranca cu no por sali for di Venezuela paso nan a wordo mancha p’e petroleo y esaki tin e capitannan basta indigna.

 

” El Fors 1″ asina yama e pos cu a bay over, den e pos aki nan ta deposita e productonan pisa cu no ta specifica of ta dimas.

“Un desaster na PDVSA, ayera durante dia a bolbe ocuri un derame pa falta di mantencion di e refineria Amuay, cu consecuencianan ecologico y economico hopi desastroso”, asina Maria Corina Machado a expresa, kende ta coordinadora nacional di e movimento político Vente di Venezuela.

Te n’e momentonan aki no tabatin niun reacion oficial di parti e Gobierno Venezolano.

 

Arubanative.com a tuma contacto cu oficina di calamidad di Aruba, pero nan mes no a haya niun notificacion di e derame aki ainda y naturalmente no lo por duna informacion si esaki lo por yega te den nos awanan teritorial, mirando cu e refineria Amuay ta keda basta serca nos isla.

Manera nos haya cualkier update nos lo publica esaki.

Leave a Reply

Top