Despues di 40 aña San Miguel a haya luz di caya

Un bario mas a wordo poni den e programa ‘Luz den Bario’ ta San Miguel cu a wordo bishita siman pasa dor di Prome Minister Mike Eman y su team.

Famianan na San Miguel a bin hunto pa organisa un atardi yena di ambiente, cu musica di Cah’i Orgel di Nelson Sprock pa celebra e hecho cu Prome Minister Mike Eman a sende e prome punto di luz LED den e bario.

E siman siguiente Elmar ta sigui cu instalacion di e di mas luznan unda cu ta existi scuridad pa añanan den e bario.

 

Minister drs. Paul Croes, kende tabata presente n’e ocasion aki, a elogia e amor grandi cu Prome Minister Eman tin pa su pueblo canando tur siman pa scucha su hendenan, nan preocupacion cu ta ensera e.o. falta di mas iluminacion.

Siman pasa diabierna despues di 40 aña San Miguel a haya luz. Esaki tabata e peticion tambe di e habitantenan ora cu nan a topa Prome Minister durante su bishita semanal den e bario.

Luz y asfalt ta loke e ciudadanonan kier.

 

“Awe nos a trece luz y nos lo bay traha pa nan haya asfalt tambe p’e bario tin tur loke nan ta desea y mas cu tur no lubida e amor cu nos tin pa e bario,” e mandatario a expresa.

El a agrega un palabra di gradicimento na personal di Elmar cu tur siman ta presente pa instalacion di e luznan y Minister encarga cu Elmar Mike de Meza, kende a duna su cooperacion cu Aruba por a haya 12 mil luz LED den e periodo aki. Pero tambe Minister Benny Sevinger, kende su Ministerio ta percura pa pago di coriente di luznan di caya.

 

“Nos lo sigui bario pa bario pa cumpli cu deseo di nos hendenan. Na momento cu nos a tuma gobernacion nos a cambia e direccion y forma con e pais ta wordo goberna.

No solamente nos tin un vision p’e pais, pero continuamente nos ta den pueblo pa scucha su necesidadnan y esey a haci cu gobernacion a yega hopi mas serca di comunidad,” Prome Minister Mike Eman a bisa.

El a agrega cu no solamente e ta lidera Conseho di Minister, pero t’e conexion entre Conseho, e pueblo y e bos di pueblo. Algo cu e ta tuma hopi na curason.

Top