Despues di bishita di Minister Richard Arends na Aruba Aloe Balm NV “Mi ta impresiona y para cu un sentido di orguyo aki den e compania di exportacion di aloe mas bieu na mundo”

“Mi ta impresiona y ta para aki cu un gran sentido di orguyo cu e compania nacional mas bieu di Aruba y compania di exportacion di aloe mas bieu na mundo, cu te dia di awe ta den operacion”, tabata palabranan di Minister Richard Arends despues di su bishita n’e compania Aruba Aloe Balm NV. unda el a haya un guia y splicacion extenso di gerencia di loke tur ta tuma lugar den e compania exitoso aki.

 

Minister Arends a cana den e veldnan di aloe unda semanalmente aloe ta wordo corta. El a haya splicacion di e proceso con pa traha productonan for di e aloe. Productonan cu ta wordo bendi na varios parti di mundo.

“Nos a discuti tambe con un compania asina bieu a sobrevivi, mirando tur e cambionan – sigur riba tereno di productonan cosmetico –  cu a bin den transcurso di añanan.

E secreto ta inovacion.”

 

Riba tur tereno a inova, cu diferente liña, tanto cosmetico como medico y esey a duna su frutonan.

Minister  Richard Arends a splica cu e mes tin bon experiencia cu un producto di nan, Alhydran, cu el a califica como un producto di calidad halto cu ta wordo exporta na mas di 30 pais na mundo.

“E compania aki ta un combinacion di un industria di materia prima combina cu inovacion cu ta habri un spectrum mucho mas grandi di oportunidadnan.”

 

“E productonan di Aruba Aloe Balm NV ta loke nos ta exporta y manera nos a wak casi tur cos ta wordo traha na man y otronan semi manual.

E parti mas importante di e empresa aki ta cu e ta emplea localnan y ta haci hopi mas uzo di otro actividadnan economico local.

Manera companianan di exportacion, di imprenta, di ekipahe y esaki ta muestra cu e compania riba su mes ta bon pa nos economia, pero tambe su efectonan di radiacion pa otro empresanan.

Mi ta kere cu esey ta hopi importante. Aruba henter por ta orguyoso di un compania manera Aruba Aloe Balm NV unda ta wak e producto prima, su proceso y e producto final den e mesun localidad. Esey a impresiona mi masha hopi mes”, Arends a bisa.

 

Minister Richard Arends a splica tambe cu Gobierno ta promoviendo sectornan di conocemento manera logistica, industrianan creativo, exportacion di nos conocemento y tecnologianan limpi.

“Mi ta kere cu Aruba Aloe Balm NV ta fit den e parti di exportacion di conocemento. E ta algo netamente Arubiano, pasobra aki ta traha cu e aloe di Aruba y converti’e den productonan medico y cosmetico, loke ta pas den e liña di pensamento di Gobierno.

Aki ta trata di un compania di conocemento basa riba export, uzando Aruba como brug pa Latino America y Europa.”

Top