Despues di insulta masha hopi hende – Awor Jan de Ruyter ta sinti su mes menasa

El a entrega keho di menaza na Ministerio Publico contra Harry Koeman

 

Ayera tardi, nos a ricibi copia di un carta fechá 7 di september, dirigí na mr. Alexander van Dam, Procurador General na Aruba, di parti di Jan de Ruijter, Presidente di Fundacion “Nos ta Aruba”, unda el a entregá un keho formal y serio contra e persona di Harry Koeman, conocido doño di diferente restaurant na Aruba, pa menaza serio contra su bida.

 

“Esun cu sembra biento lo coseha orcan”, ta un dicho masha conoci, pasobra Jan de Ruyter ta conoci pa persona, kende a bin ta insulta, ofende masha hende na Aruba y hopi tabata puntra, con bin husticia no a pone man riba dje. Awor cu el a ser menasa, manera un cacho cu rabo mei-mei su pia ta core bay Ministerio Publico.

 

Jan de Ruijter ta bisa di ta conocí pa su articulonan scerpi cu den nan mayoria ta trata situacionnan politico, den cua e NO ta mustra miedo pa habri su boca (“geen blad voor zijn mond nemen”), y NO ta ria pa “nombra e yiu na su nomber” (“het kind bij zijn naam noemen”).

 

Aki ta sigui e traduccion di e keho di Jan de Ruijter:

“Keho y denuncia di amenaza serio riba mi bida dor di Harry Koeman, bibando y trahando riba Aruba, doño di 8 restaurant riba Aruba bao di e nomber “Aruba Wine and Dine”, cu oficina na Seaport Market.

 

Apreciable sr. Alexander van Dam,

 

Manera custumber semper mi ta manda mi kehonan na bo persona, manera antes mi tabata manda nan pa oficial mayor (hoofdofficier) Olthof.

E biaha aki mi keho lamentabelmente ta trata un menaza serio contra mi bida, cu awe, dia 7 di september 2017 pa 8’or di mainta, Harry Koeman, doño di 8 restaurant aki na Aruba, a lanza contra mi persona.

E menaza a tuma lugar riba e teraza di Cafe de Plaza den Seaport Market.

Nos tabatin un cita pa 8’or, y e prome palabranan di Harry Koeman ya caba tabata encera algun expresion menos bunita den mi direccion, pa motibo cu mi persona, como columnista fiho di e matutino Solo di Pueblo y como Presidente di Fundacion “Nos ta Aruba”, diariamente ta scirbi un articulo den e matutino mencioná, y na unda den e ultimo siman mi a bolbe dirigi mi mes na ex-Minister di Turismo Otmar Oduber, fundador y “lijsttrekker” di e partido politico nobo “POR”.

 

Koeman di su banda, kende manera ta conocí ta E sponsor grandi di Otmar Oduber y di POR – locual porcierto e gusta tende di hende, y ta bati riba su pecho p’esaki – a dunami un “bon-bini” caluroso cu e palabranan cu mi ta un gran sushi y sinberguenza (“schoft”), y cu e, Koeman, un dia lo “habri un buki” riba mi bida.

Koeman tabata masha indigná y endemoniá (“des duivels”) pa motibo di mi articulonan riba Otmar Oduber, el a menazami di kita mi bida, y el a bisami cu: “e resultado di e eleccion lo no tin ningun significacion pa mi persona, pasobra ami lo NO weita e resultado ey toch…pasobra lo mi t’ey mas!”

Si esaki no ta un menaza serio, directo y hopi cla, kico Sĺ ta wordo considerá un maneza asina serio !!

 

Diferente biaha mi a bisa Koeman cu mi no kier baha te na SU nivel di manera, ni tampoco usa su idioma sushi di caya, pero e meneer a sigui grita y blaf cu un cara corá rabiá, cu lo mi ta kere cu mi ta masha cos, cu mi ta sobre-estima mi mes, cu mi no tin ningun balor riba Aruba, y cu mi articulonan no ta haci absolutamente ningun diferencia.

El a blof (opscheppen, bluffen) cu ainda e dia anterior, pa tur hende por a mira, el a sinta lunch den su Cafe de Plaza cu Evelyn Wever-Croes, Glenbert Croes y Dangui Oduber, respectivamente lider di partido y candidatonan riba e lista di MEP, y cu e a regalanan placa pa nan traha hunto cu POR.

 

Mi no por keda sin menciona cu Koeman a actuá manera un berdadero Don Corleone, kende for di su Cafe de Plaza ta comanda, y ta dicidi kico ta sosode den politica riba Aruba, y cu e ta sumamente disgustá y rabiá pasobra nu ciudadano Arubano NO ta scuché!

Su menaza tambe a bay den e estilo “Don Corleone”, sará, arogante, y semper tratando na intimidá esnan cerca.

Un luna pasá mi a informá sr. Rajen Budhu Lall, Director di e Gabinete di Gobernador, caba, cu mi ta evaluando pa retira pa motibo di menazanan, pero mi ta weita cu mi no por haci esaki, y lo mi no hacié tampoco.

 

Den e ultimo 8 añanan Aruba a wordo destruí completamente door di e famia Eman, door di tur e Ministernan den e Gabinetenan Eman, y door di hendenan manera un Leoncita Arends y su famia, door di un Franklin Abath y otro complicenan.

Aruba a wordo destruí economica y financieramente, tambe riba tereno social, gubernamental y politico; y mester bin un fin n’esaki; ta p’esey tambe cu mi ta sigui scirbi y cu mi ta sigui traha pa un mihor futuro pa Aruba.

 

For di mi kehonan y mi cartanan bo sa cu Otmar Oduber ta culpabel na fraude, y na corupcion den e proyecto di Hard Rock Hotel, pero tambe den e asina yamá “Strawberry Gate”, e placa di Arubus y di ATA cu a cria pia,y e conspiracion y cuchi-cuchi politico cu AVP.

Otmar Oduber ta un di esnan cu a comete mas hopi fraude riba nos isla, y mediante mi kehonan contra su persona y cu mi articulonan den corant y demas social media mi kier splica esaki nba e comunidad Arubano.

Di mes esaki kier men cu lo mi no stop cu e trabao aki.

 

En bista di e seriedad grandi di e caso aki, combiná cu e tensionnan creciente den e ultimo simannan prome cu eleccion di dia 22 di september, mi ta weitami obligá di solicita urgentemente serca bo proteccion door di Polis.

Mi ta tuma e libertad di manda copia di e carta aki n’e instancianan cu ta sigui mi trabaonan, y cu tin comprension y simpatia p’esaki. Confiando di por tende di bo”, Jan de Ruyter a finalisa su carta di denuncia.

(Nota di Red: Normalmente nos di AWEMainta no sa duna mucho publicidad na articulonan di Jan de Ruijter, keda a nombra su mes como Presidente Fundacion “Nos ta Aruba”. Pasobra manera bisa, e ta gusta insulta bagatalisa y mucho mas cos, y awor el a haya un hende pa par’e)

 

 

Leave a Reply

Top