Despues di reunion cu Eman y Yrausquin, lider di CDA van Haersma Buma “Nos tin un pasado hunto y nos tin tambe un futuro hunto”

DEN HAAG – Prome Minister Eman hunto cu Minister Plenipotenciario Juan David Yrausquin a reuni cu lider di CDA y di su fraccion den Tweede Kamer mr. Sybrand van Haersma Buma den su oficina den Den Haag.

Despues di e reunion van Haersma Buma a bisa cu esaki a bay den hopi bon ambiente. El a bisa cu loke p’e ta di gran importancia ta pa un Gobierno nobo (siman pasa tabatin eleccion na Hulanda) tin un relacion enfoca riba futuro di Reino.

 

Lider di CDA van Haersma Buma a bisa, “Mike Eman a indica tambe con importante e ta haya un relacion asina. Un otro punto importante ta cu den tur parti di Reino mester tin e miho futuro pa tur ciudadano. Esaki ta un meta di CDA, un meta pa Gobierno di Aruba y mester ta tambe un meta pa e Gobierno Hulandes nobo”.

 

Van Haersma Buma a bisa cu un di e puntonan cu tambe a bin dilanti ta con reenforsa otro. “Aki bo ta papia riba economia, e metanan di Nacionnan Uni pa loke ta desaroyo duradero. Aruba ta masha envolvi cu desaroyo duradero”, el a splica.

Lider di CDA a bisa tambe cu Hulanda semper por siña hopi di Aruba y esaki ta loke semper ta resalta durante encuentronan cu otro. P. e. con ta haci transicion di un economia na un futuro duradero, agregando “mi ta haya esaki algo masha inspirativo.”

 

Van Haersma Buma a splica cu ainda nan ta den e fase unda cu ta sondea tur posibilidad con hinca un gobierno nobo den otro.

“Mi opinion ta cu nos mester ta cla con nos kier mira Reino. Di e Gabinete saliente mi a yega di sinti mas cu un biaha cu Reino manera cu e ta mas un sorto di ‘obligacion.’ Rutte a hasta yega di bisa ‘un yamada y nos ta deshaci di nan’.

Ami sigur no ta comparti e pensamento ey. Nos tin un pasado hunto y nos tin tambe un futuro hunto. Ta responsabilidad di e parti Europeo y e parti Caribense di Reino pa percura pa e futuro pa e ciudadanonan ta mas bunita y miho posibel. Ami sigur kier contribui na esey”, Van Haersma Buma a duna di conoce.

Top