Despues di un exitoso protesta, Minister Angel Bermudez lo contesta chofernan di truck riba nan peticion

Nan a reuni na altura di Marlboro Ballpark, pa sali direccion pa Bestuurskantoor pa manifesta nan disgusto y pa papia cu Minister Angel Bermudez riba e hecho cu awor Departamento di Impuesto kier pa nan, esta esnan di DT-nummer, paga nan belasting di truck den un solo biaha.

 

Den un combersacion cu e vocero di e chofernan di truck, Femmy Faro, el a duna di conoce cu nan a desea pa Gobierno por ta flexible cu nan, pa loke ta pago di number, p’e biaha aki nan no tin cu paga un solo biaha, pasobra e ta pisa hopi riba nan presupuesto.

Tin di e chofernan aki, tin cu paga Afls. 1800,= na belasting di nan truck y ora a papia cu Minister Angel Bermudez, a haci e peticion pa sikiera tuma nan consideracion p’e biaha aki nan paga sea den dos biaha of per kwartaal.

 

Den mesun rosea, Femmy Faro a duna di conoce cu nan no ta nenga di paga, pero cu Gobierno mester percura pa mihor caminda tambe, cu ta masha kibra.

Minister di Finanza, mr. Angel Bermudez a bin abao y a papia cu e chofernan y el a priminti nan cu pa diahuebs awor e lo tin un contesta pa nan.

Por a sinti cu Minister mr. Angel Bermudez tin tur comprension p’e peticion di doñonan di DT-nummer.

 

Despues cu e chofernan a haya e garantia cu diahuebs awor nan lo haya un bon noticia, e accion di protesta dilanti di Bestuurskantoor, unda kier o no, a blokea henter e trafico, a dicidi di bay y trafico a normalisa.

Top