Destinacion di fondonan restante di Fondo Desaroyo Aruba

 

E 16 miyon florin Arubano (mas o menos 9 miyon euro) cu ta resta di e fondo di desaroyo di Fondo Desaroyo Aruba (FDA), riba termino corto lo keda destina pa e. o. drechamento di caminda y demas infrastructura ocasiona pa e mal tempo cu Aruba a pasa aden na november 2016, bon gobernacion, desaroyo duradero, mantencion di ley, enseñansa y proteccion di naturalesa.

E suma pa naturalesa ta principalmente destina pa proteccion di e rifnan di coral.

Esaki ta loke Minister Presidente di Aruba, Mike Eman, y Minister di Asuntonan Interno y di Relacionnan di Reino, Ronald Plasterk, a acorda.

 

Entre 2000 y 2016 a ehecuta seis programa di mas aña, den cuadro di e relacion di cooperacion nobo entre Aruba y Hulanda. Tur dos pais a deposita placa den e fondo di desaroyo, Fondo Desaroyo Aruba (FDA).

A financia 763 proyecto den e periodo aki cu FDA, pa un suma total di mas cu 500 miyon florin Arubano, dividi den e sectornan: calidad di gobernacion, enseñansa, salubridad publico, desaroyo economico duradero, mantencion di ley y Producto Aruba. Na fin di september Fondo Desaroyo Aruba lo bin cu e cuenta final.

Top