Destruccion grandi di naturalesa na caminda: Palo di mondi, mangelnan y proyecto Watty Vos ta bira e desastre pa nos Medio Ambiente

Arubianonan tin rabia riba Medio Ambiente? Ta kap, kima y destrui palonan den pleno naturalesa. Mangelnan cu internacionalmente ta proteha y ta cay bou di Ramsar aki na Aruba, NADA NADA no ta proteha.

Ta un berguensa nacional cu awe ainda nos ta kap, sin misericordia, sin escrupulo ta haci destruccion na nos Medio Ambiente, segun Stimaruba.

 

Hobennan consciente rond di mundo ta grita pa stop, y aki na Aruba hobennan no ta haci nada nada pa mustra trato na nos matanan. Mester ta consciente cu esnan cu ta nos futuro mester para’riba y corda riba nan porvenir y generacion di futuro.

President Obama un personalidad cu vision ambientalista kier mira cambio di mentalidad. Un mentalidad di conserva y cuida loke ta mundo su patrimonio.

Nos ta gusta copia di Merca, nos ta haci y nos ta come loke ta bin di Merca. Obama a splica dilanti di mas di 500 mil studiante HBI-ers, cu ta mustra cu futuro ta nos Medio Ambiente, esnan cu escoge nan estudio pa ésaki tin futuro.

 

Laga na Aruba tambe nos Gobierno, nos sa demasiado poco riba e materia di naturalesa.  Laga na Aruba tambe pueblo y su Gobierno cuida nos matanan of naturalesa.

Pa nos stimula nos pilar no 1 cu ta turismo, nos mester cuminsa pensa positivo riba Medio Ambiente, segun Stimaruba.

Comunidad di Aruba kier un lugar unda cu tur por biba den harmonia cu naturalesa.

Spaans Lagoen ta grandemente bou tension y ta tur destrui. Man y machinnan gigantesco a kibra y a haci daño grandi na nos Mangelnan.

Algun hende so a protesta cant’i caminda riba e brug.  Hasta migrantenan den Spaans Lagoenweg  a kima mangelnan.

Nan ta tira nan desperdicio riba e mangelnan pa despues den marduga ta kima nan sushi y kima e mangelnan.

 

Pakico nos tin rabia riba nos matanan? Cu ta duna nos rosea saludabel y pornada. Pakico den nos constitucion penal no por pasa articulonan p’asina por boet esnan cu ta baha nan furia riba naturalesa?

Nos no ta come pisca y mas producto di lama? Awe nos ta mira miles di pisca morto. Ken t’e culpabel?

Den Spaans Lagoen tin potret saca di aña pasa cu tin masha hopi pisca morto. Ata e caso aki ta ripiti.

Un ehempel nos ta mira con a drechando Mangel Halto, p’e ta actractivo pa famianan cu ta haci uso di e frescura di e mangelnan y e lama.

Dios a bendiciona Aruba cu un lama limpi y santo blanco manera suco. Cuide!

 

Aruba mester keda e isla como un regalo pa proximo generacionnan por gosa di dje. Stop di grita Green Coridor, un falsedad di clase mayor.

Ehecuta ROP, Ordenansa di Zonificacion pa tur mata palonan cu ta crece haya balor.

Palo endemico,  sitionan cu nan balornan natural, e parhanan cu a resta mester worde proteha y piscanan di rif cu ta brui den Spaans Lagoen. Soldachi, cangreunan den mondi y esnan cu ta bay pa lama pone nan cabuchi, Olinda Rasmijn di Stimaruba a conclui.

Top