Detencion di dos sospechoso

WILLEMSTAD – Continuando cu e investigacion relacioná cu e ladronisia na Diamantweg dia 17 di òctober 2017, Polis a haci dos detencion.

Diaranzon 18 di òctober 2017 alrededor di 10.44 or, despues di a rondoná un cas na Caya Nubia Polis a detené e hombernan: G.C.M. di 21 aña di edad; K.M.B. di 22 aña di edad, ámbos nacé na Còrsou, como sospechoso di e caso ariba mencioná.

 

Durante investigacion den e cas na Caya Nubia Polis a haña y confiscá: Un kashi di un arma di candela; Un rifle; Tres saco cu simia di marihuana; Mata di marihuana; Un carson còrtico manchá na sanger, cu ta cuadra cu e paña cu e sospechoso tabatin bistí na momento di e intento di ladronisia.

 

Durante detencion di e sospechoso K.M.B. e agentenan a nota cu e tabatin un herida di bala na su atras. E sospechosonan aki den oranan di ayera mainta tabata lòs bala den laira den e área di Sero Fortuna.

A presentá e sospechosonan dilanti un Fiscal auxiliar kende a ordená nan encarcelamento, pendiente di mas investigacion.

Top