Detencion y confiscacion di arma di candela

WILLEMSTAD – Manera a keda anuncia recientemente Polis ta intensifica su control pa combati criminalidad en general y posicion di arma di candela ilegal en particular.

Tur dia tin controlnan dirigi na diferente sitio na Corsou.

 

Den cuadro di esaki, diadomingo 26 di maart 2017, alrededor di 11:00am, un unidad di Polis atento a nota un auto cu glas scur cu tabata staciona riba Kaya Kazerne. E Polisnan a bay direccion di e auto aki pa bay haci un control. Na e momento ey un homber a sali for di e auto y cuminsa cana bay y despues a saca careda core bay.

 

E homber sospechoso aki tabatin un tas di barica preto hunto cu ne. E Polisnan a persigui e homber aki na pia y a bin deten’e den Kaya Militar. Mesora nan a nota cu e no tin e tas preto mas cu ne.

Despues di un investigacion breve nan a topa cu e tas preto den cura di un cas na Kaya Kazerne cu ta rib’e ruta cu e sospechoso a core durante su huida. Den e tas Polis a haya y confisca un pistol y tambe cedula y rijbewijs di e sospechoso y un portemonnaie.

 

E sospechoso aki J.I.U.A. naci na Corsou 20 aña di edad a keda deteni como sospechoso pa violacion di Ley di Arma di Candela.

A presenta e sospechoso dilanti di un Fiscal Auxiliar cu a ordena su encarcelamento pendiente di mas investigacion.

Top