Detenido na Merca ta bay sinta su castigo na Corsou

WILLEMSTAD – E homber S.A.H. (1968), naci na Saint Catherine (Jamaica), pero cu nacionalidad Hulandes y hopi aña biba na Corsou, a keda sentencia na Estados Unidos pa importacion di cocaina.

H. a keda sentencia 16 di december 2015 dor di US District Court for the Southern District of Florida na un castigo di 30 luna di prizon pa importacion di 150 bolita dia 12 di juni 2015 na momento cu el a biaha riba un buelo di Corsou pa Miami.
El a keda traslada pa un hospital na Miami na unda el a saca e bolitanan via sistema natural for di su stoma. For di dia di su detencion e ta cera den un prizon na Merca.

Diabierna atardi 21 di april, H. a yega Corsou for di Miami. El a keda custodia pa dos Polis di Division Crimen Organisa di KPC. H. ta bin bek Corsou a base di tratado internacional pa sinta sobra di su castigo den e pais na unda e tabata biba, den e caso aki Corsou.
Reino Hulandes y Merca ta ambos partido di e tratado internacional aki.

Den e caso aki no ta trata di un extradicion di un sospechoso, pero di un condenado na Merca cu ya caba a keda sentencia. El a haci, a base di e tratado, un peticion pa sinta sobra di su castigo na Corsou. Ambos pais, despues di analisis profundo, a bay di acuerdo cu esaki.
E meta di e intercambio aki ta resocialisacion.

Pronto H. ta keda presenta na un Hues na Corsou. Esaki a base di un demanda di Procurado General (PG) pa ehecusion di e castigo cu el a ricibi den exterior. E castigo Mericano lo keda, a base di hechos y circunstancianan, transferi pa un castigo di Corsou, esaki a base di criterio, pa e sinta sobra di su castigo aki nan. Hof ta dicidi finalmente riba esaki.

Top