Di 250 cu ta riba lista. 90+ Empleado di InselAir a haña carta di retiro diarazon ultimo

WILLEMSTAD – Diarazon tabata un dia dramatico na InselAir y tabata parce manera preludio di un derumbe total di nos pilá di aviacion na Aeropuerto Hato.
Reportadamente esnan cu ta laborá Departamento di Mantencion a haña carta pormé y esey a conduci na escenanan di drama feros na Aeropuerto.

Na tur mester baha 250 empleado for di lista di e compania cu actualmente tin solamente dos Avion Fokker 50 den servicio cu cual ta mantené coneccion cu Aruba, Bonaire y Islariba.
Originalmente tabata intencion pa laga e masacre laboral aki tuma lugar den un tiro, pero pa circunstancia imprevistao a haci’e style di salami.
Ademas a purba di tene cuenta cu e aspecto humano, pasobra ta hende e empleadonan ta di cual e gran mayoria a traha cu gran dedicacion pa InselAir.

No a informá kende den gerencia di InselAir a haña ‘pink slip’, pero no por cu henter e gerencia sino InselAir lo bira manera un barco sin timon.
E sindicato cu ta representá e personal no a keda mashá contento cu e forma con cos a bay, pasobra gerencia no a informá ni consultá cu nan.
Porcierto cu sindicato UGTK/Cadmu no a keda reconoci ainda pa gerencia di InselAir.

E culminacion di e drama laboral aki a cuminsa na momento cu Gobierno di Aruba na final di januari ultimo a ordená pa tene tur avion MD di InselAir na tera, pasobra no por garantisá nan condicion tecnico.
E avionnan ta registrá na Aruba, pero ta stacioná na Corsou y Aruba no tin bista si InselAir ta cumpli cu condicionnan di ICAO pa mantene e avionnan.

Banda di esaki e compania a pasa den turbulencia financiero severo y considerando tur esaki InselAir no tabatin otro alternativa sino di pidi moratorio pa posponé pago di su debenan.
Corte a consede nan loke nan ta yama surséance van betaling te juli proximo y den e tempo ey nan tin cu pone òrdo riba nan asuntonan.
E paso cu e compania a tuma ta necesario pa reorganisá e compania.
Porcierto cu bulando cu dos avion so e compania ta cumpliendo rasonablemente bon cu buelonan na tempo.
Di tur manera seguridad di biaheronan ta nan prioridad. E vocero di UGTK/Cadmu a exigi pa ora retiro cay manda personal stranhero promé.

Leave a Reply

Top