Di acuerdo cu algun observador Minister drs. Paul Croes mester retira y laga husticia haci su trabao

Awe mainta, un miembro di prensa a puntra e Fiscal Mayor, mr. Erick Olfhof si Minister Paul Croes mester retira, corectamente mr. Olfhof a bisa, cu esey no ta su competencia pa exigi esey. Su trabao ta pa haci un investigacion penal riba denuncianan haci pa determina si e mandatario y su hendenan a viola ley of no pa despues persigui nan penalmente di acuerdo cu ley.

Un rato despues den conferencia di prensa di Prome Minister Mike Eman, mesun pregunta a ser haci y e Premier a duna di conoce, pa duna Minister Paul Croes e espacio p’e pensa kico e ta bay haci. N’e momento ey, Paul Croes a bay consulta cu su abogado riba loke e ta ser acusa. No ta intencion di Prome Minister Mike Eman pa exigi nada, y manera el a declara anteriormente, laga Orden Legal haci su trabao, pa cual nan mester tin espacio pa trece claridad den e caso fastioso aki.

Inocencia di un hende ta keda, te ora cu keda comproba cu no t’asina, pero na mesun momento mester duna respet na nos propio institutonan pa duna espacio n’esnan cu ta haci un investigacion.
Si Minister Paul Croes mes lo retira, ta keda puramente na su propio persona. Den e siguiente oranan Minister drs. Paul Croes lo dicidi su decision, cu sigur Gobierno y partido lo sa di respeta.

Prome Minister Mike Eman a haya cu Paul Croes, ta un hoben promotedor y asina el a dicidi drenta politica. Si e no a drenta politica, Paul Croes lo no a hay’e den un situacion asina, cu ta un situacion doloroso no solamente p’e, pero tambe pa su famia.

Combersando cu algun observador, nan ta haya cu Husticia haci su trabao, sin ningun clase di presion, ta na su lugar pa drs. Paul Croes retira un rato como Minister y si e no ta culpable, semper e por bolbe den su puesto di Minister atrobe, maske cu eleccion ta net dilanti porta.

Top