Di acuerdo cu Andin Bikker: Nos mester prepara nos mes un huristanan local pa traha nos ley nan, nos por traha nos propio leynan local

Riba un pregunta di Otmar Oduber tocante si mester di huristanan pa traha ley, Andin Bikker a trece dilanti cu na 2014 el a trece un resolucion den reunion tripartite conhuntmente cu e departamentonan di Corsou y Sint Maarten, caminda nan a acorda cu pa medio di Universidadnan di Aruba y Corsou y pa medio di instancianan di Educacion di Sint Maarten, nan a bin na un Academia di Ley cu ta bay coopera na traha e leynan pa tur e islanan. Esaki a travez di cursonan pa Wetgevings Jurist.

 

Bikker a bisa cu hopi hende no ta realisa cu un wetgeving Jurist estilo Europeo Hulandes ta un persona cu despues cu e gradua como hurista, mester bay na un Post Academie Opleiding pa motibo cu Hulanda tin e dimension di loke nan ta yama “acute communiteit”.

Den Union Europeo a base di esey ful e bachi di ley y ordenansanan Europeo mester wordo teni na cuenta ora cu na Hulanda nan ta traha nan leynan local.

 

Sin embargo, nos leynan na Aruba mas bien ta parce e leynan cu nan tin den provincia of municipio. Si wak e islanan BES p. e. nan a tuma tur nos leynan over y practicamente ta e Codigo Civil y Codigo Penal di Aruba, Corsou y Sint Maarten, ta vigente na e islanan BES.

Esey kiermen cu ta relativamente facil cu den seis luna por educa e huristanan pa por traha nos tipo di leynan y no tin nodi di tene cuenta cu ordenansa y leynan di Union Europeo, pasobra nos no ta parti di UE.

 

Bikker a enfatisa cu si ta falta di huristanan tin pa modernisa nos leynan, ta algo cu ta cay bou di Parlamento, nan por presenta leynan di iniciativa y eynan siguramente ta hustifica cu mas pronto posibel mester bin un reunion publico den Staten.

Su persona lo traha un peticion riba esaki y lo pidi cooperacion, pasobra un persona cu un asiento mester di dos firma mas por bin na un reunion publico; Parlamento mester stop di tene “bijeenkomsten” cu ta algo casi protocolario. Y e ta duna e Minister oportunidad di defende su mes sin uza e instrumentonan di Parlamento manera ta cay bou di nos constitucion.

Top