Di acuerdo cu Andin Bikker: Pueblo lo haya e cambio con POR, e Forsa Nobo, por combati criminalidad dia 22 di september 2017

Andin Bikker a bisa den rueda di prensa di Partido POR, e Plataforma Forsa Nobo, relaciona cu e tema di maneho deficiente di Minister di Husticia y mirando cu posiblemente e lo wordo postula bek riba lista pa AVP, cu tarea di pueblo ta haci un diferencia dia 22 di september cu tin eleccion, caminda comunidad lo duna un sosten na e partidonan cu si ta bin cu un cambio, manera nan partido POR.

 

Sr. Bikker a expresa, “Nos si tin un vision, nos tin un plan, y concretamente nos lo bin cu solucionnan efectivo y concreto pa cu combatimento di criminalidad. Mi por anuncia for di awor caba cu manera nos a anuncia un par di siman pasa, aworaki nos tin un fecha concreto y nos ta spera cu den luna di juli, tin e. o. akinan, sr. Peter Tarlow, internacionalmente reconoci pa seguridad di turismo pero tambe pa seguridad di pueblo en general.

 

Peter Tarlow lo ta akinan pa un siman pa asisti nos y duna lecturanan p’asina brainstorm y probablemente ta spera di institui un curiculum, cu internacionalmente personanan trahando den e seguridad di pueblo y combatimento di terorismo y criminalidad, haci e curso na Aruba mes, pa asina duna un señal internacionalmente cu Aruba ta preocupa cu e ola di criminalidad, cu ta sutando nos pueblo”, sr. Bikker a bisa.

 

POR kier bin cu solucion pa esaki, dunado sesionnan di brainstorm tanto local como internacinoalmente, pa duna atencion na e tema hopi preocupante aki, sr. Bikker a conclui.

 

Leave a Reply

Top