Di acuerdo cu BCA, Maneho monetario (mei 2017) – Reserva internacional a conoce un leve aumento di 3.2%

Aruba no tin inflacion

 

Durante e reunion di dia 4 di mei 2017 e Comite di Maneho Monetario (CMM)[1] di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11% y e “advance rate” na 1%, despues di a evalua e datonan economico y monetario mas recien.

A considera e siguiente informacion y analisis den e proceso pa yega n’e decision aki.

 

RESERVANAN INTERNACIONAL

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di maart 2017.

Mientras cu a registra un aumento den e reservanan internacional (+Afl. 60,3 miyon of 3,2% ), reservanan oficial a keda practicamente mescos (−Afl. 0,1 miyon of 0,0%), compara cu december 2016.

Consecuentemente, e reservanan internacional y e reservanan oficial a yega, respectivamente, te na
Afl. 1.952,7 miyon y Afl. 1.673,1 miyon na fin di maart 2017.

 

DESAROYONAN DEN CREDITO

E crecemento di credito total di e banconan comercial a bira positivo (+0,5%) na final di maart 2017 compara cu december 2016. Mientras cu a registra caidanan den credito na empresa (−0,3%) y credito na consumidor (−2,3%), a observa expansionnan den fiansa pa construccion di cas (+0,7% ) y e componente ‘otro’ di credito bancario (+7,4%) na maart 2017 compara cu december 2016.

E ultimo ta refleha e compra di bononan di Gobierno dor di e banconan comercial.

 

INFLACION

Na maart 2017 a registra un caida den e prijsnan compara cu e aña anterior (−0,1%) como tambe den e promedio anual di inflacion (−0,7%).

E prome ta principalmente causa pa un reduccion den e tarifa di coriente (januari 2017), cual a wordo parcialmente mitiga pa un subida den e componente di transporte di e Indice di Prijs di Consumo (CPI).

E bahada den e promedio di inflacion ta debi n’e promedio di prijsnan di gasolin mas abou y un reduccion den e tarifa di coriente (januari 2016).

E promedio di inflacion ora exclui e componentenan di cuminda y energia a yega na 0,4%, primordialmente reflehando un aumento den e componente di vivienda di e CPI.

 

TURISMO

Durante e prome tres lunanan di 2017, e debilidad den e mercado Venezolano a resulta den caidanan den e cantidad di bishitante (−15,0%) y anochinan permaneci na Aruba (−7,3%).

Di otro banda, a registra un expansion den e cantidad di turistanan crucero (+0,4%), mientras cu e mercado Mericano a presta faborabelmente, loke ta refleha pa un impulso den e ingresonan turistico registra na banconan comercial (+3,7%).

 

PLACA DEN CIRCULACION

Na maart 2017 e cantidad di placa den circulacion a subi cu Afl. 83,4 miyon te na Afl. 4.180,9 miyon, compara cu e luna anterior.

E aumento aki ta debi na un impulso den credito domestico y den e compranan neto di divisa cual a resulta di ingreso turistico cu a surpasa pagonan neto pa bienes y servicionan.

 

MERCADO FINANCIERO

Na maart 2017 a nota un caida den e averahe di interes riba depositonan nobo (−0,2 punto di porcentahe te na 1,2%), mientras cu e averahe di interes riba prestamonan nobo a keda mescos (7.9%), compara cu e luna anterior.

Consecuentemente, e averahe den e margen di e tasa di interes aumenta cu 0,2 punto di porcentahe te na 6,7%.

 

ADVANCE RATE

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,21 punto di porcentahe na maart 2017. Consecuentemente, no tabatin razon pa cambia e “advance rate” di BCA.

 

Top