Di acuerdo cu Chris Dammers: Na Departamento di Aviacion Civil di Aruba, no tin ningun iregularidad cu ningun inspector

 

Como ta dificil pa haya e Director di Aviacion Civil, Edwin Kelly, pa sa mas di ultimo desaroyonan rond di InselAir, y pa haya sa mas di e rumornan cu ta circula cu tin 2 inspector di Aviacion Civil cu lo ta riba payroll di InselAir, a pone nos aserca e Parlamentario di AVP, Chris Dammers, kende tabata emplea na Departamento di Aviacion Civil y sa masha di aviacion.

 

El a cuminsa na desmenti cu na Aruba tin 2 inspector suspendi, te cu nan lo ta riba payroll di InselAir.

Na placa chiquito Chris Dammers a splica cu tin dos tipo di Inspector. Tin Inspector p’e parti tecnico, kendenan ta inspeccion tur avion cu kier bandera Aruba.

P.e. Jorge Colindres, di e compania The Registry of Aruba, ta dedica na registra masha avion bao nomber di Aruba.

 

Dicho persona ta paga ticket, hospedahe di e Inspectornan pa bay inspeccion e avionnan cu kier registra bao di Aruba. Porcierto te cu fin di aña pasa, tin un 100 avion registra pa Aruba. Un proceso cu ta genera basta placa pa Gobierno.

Ora di registra un avion pa Aruba, ta Jorge Colindes ta paga tur e gastonan. Nada malo den esaki.

 

Pa loke t’e rumor cu tin Inspector cu ta riba payroll di InselAir, tampoco ta cuadra cu e berdad, segun Chris Dammers.

Si t’asina cu t’e propio pilotonan ta inspectornan alabes. P.e. si un piloto ta bula pa InselAir Aruba, e ta bira inspector di InselAir International. Pa haci e trabao di inspeccion ta logico cu den caso di Aruba, InselAir International ta pasa e piloto aki, cu ta bulando pa InselAir Aruba. Atrobe no tin nada iregular den esaki. E ta hasta un acuerdo firma, cu ta na bienestar di e propio pilotonan pa mantene nan licencia vigente.

Pesey e rumornan cu tabata circula, pa loke ta Aruba, esey no t’e caso. Na Aruba, e inspectornan Hulandes no a haya nada iregular, cu excepcion algun eror administrative.

 

E hecho cu a ground algun avion di InselAir Aruba, ta meramente cu e inspectornan a constata cu maske cu a wet-lease e avionnan cu InselAir International, no tabatin un debido mantenimento, maske cu a avisa InselAir p’esaki. Pero nan a keda negligente y no por a haci otro di ground e avionnan.

Chris Dammers te cu ayera no a tende nada cu si lo doek-op InselAir Aruba, no mas lo manda un te dos avion pa bay registra na Corsou.

InselAir lo no kier de-registra tur avion di Aruba, pasobra e lo ta mas funesto pa InselAir International.

 

CORSOU

Relaciona cu mesun rumornan aki, Autoridad di Aviacion Civil Còrsou (CCAA), tambe a duna di conoce cu esaki no ta cuadra cu bèrdad. P’e motibo aki, Minister Camelia-Römer ta aclará esaki debidamente.

Pa loke t’e rumornan cu tin inspectornan di CCAA lo ta riba ‘payroll’ di Insel Air y cu tin papia cu e inspectornan aki lo tin companianan cu ta bende InselAir piesa, a pone cu Minister Camelia-Römer a tuma e decision pa pone 2 inspector/ámbtenaar di CCAA riba ‘non-actief’ pa un periodo di 2 luna.

 

E inspectornan aki a haña ‘toegangsontzegging’ cu ta enserá cu nan no por drenta oficina di CCAA. Mesora Minister Camelia-Römer a duna e compania Forensic-Caribbean e tarea pa haci un investigacion amplio. Nan lo investigá si tin trabounan cu 1 òf mas ámbtenaar di CCAA ta haci cu ta contra di e ‘Landsverordening Materieel Ambtenarenrecht’ (LMA) y reglanan di bon gobernacion.

 

Tambe lo wak si tin relacion di trabou cu InselAir òf otro áreanan di aviacion cu no ta permití. E investigacion aki ta dura 1 luna.

Top