Di acuerdo cu Joselin Croes (POR): Mayoria di nos hobennan studiando na Hulanda no kier bolbe Aruba ora nan caba di studia pa motibo di falta di mihor oportunidad

Despues di a papia cu un grupo grandi di hoben profesional studiando y trahando na Hulanda, no por conclui otro cu e hobennan ta fada, disgusta y abergonsa con ta hiba politica na Aruba y nan kier mira cambio den esaki y den e forma di goberna nos pais, segun Joselin Croes.

 

Den un articulo anterior Joselin a mustra su preocupacion pa e hecho cu Aruba ta perde hopi di gana dor di e hecho cu nos hobennan no ta bin bek Aruba ora nan caba di studia afo.

Joselin a puntra nan dicon nan no kier bin bek mesora y esaki ta algun di nan respuestanan:

 

“Actualmente mi no ta kere mi lo bolbe bek Aruba ora mi caba di studia. E motibo principal ta cu simplemente aki na Hulanda tin mas werkgelegenheid pa hendenan di mi specialisacion. Na di dos lugar, e pago tambe ta verschil per saldo substantialmente, mi lo cobra double di locual cu mi lo cobra na Aruba aki na Hulanda. Teniendo na cuenta cu mi tin un debe asina halto, e no ta cumbini ami ni mayoria studiante pa bolbe bek mientras tin un deficiencia den cupo di trabou cu ta paga bon na Aruba”.

 

“No di biaha paso mi a haya mihor oportunidadnan afo y toch tin hopi pa siña y ami kier experiencia e bida den exterior. Aruba ta hopi chikito y e mentalidad di e hendenan riba werkvloer ta completamente diferente cu den un international setting. E productividad ta mas halto den exterior y pa e motibo aki bo ta hanja mas motivacion pa hinka mas effort den bo trabou y asina sobresali mas den bo materia.

 

“Mi lo bolbe eventualmente pero pa e proximo 5-10 añanan ki mi lo prefera develop mi mes mas cu ta posible den exterior y sigi siña fe mi coleganan y werkomgeving”

 

Esaki ta sumamente preocupante, paso si tur hoben ta pensa asina Aruba lo no tin young professionals mas pa bin tuma over e riendo di e pais. Lo no tin influx di mente fresco y ideanan inovativo pa trece cambio, lo tin un brain drain formal, Joselin ta splica.

 

Si Aruba no inverti den e hobenanan aki, si Aruba no brinda nan mesun oportunidad financiero y economico cu Hulanda of Merca ta brinda nan y si Aruba no duna nan un break den nan studie lening y no por yuda na build up nan mesun compania y traha nan mesun cas nan lo no bolbe.

 

Aruba ta inverti miyones den e educacion di un yiu di tera. Nos ta educando hobennan pa otro paisnan probecha di nan talento y productividad. Nos ta laga nan slip dor di nos dedenan paso nos no ta ofreciendonan ningun incentivo pa bolbe. Incentivo den reduccion di di nan studie lening pa e prome añanan, incentico pa nan start up business, incentivo den bin cu un economia nobo na unda nan por haya cupo di trabou, ofrece nan bon salario y bon trabou. Crea oportunidadnan pa nan y hacie atractivo pa nan bolbe.

 

E Forsa Nobo ta trahando duro riba su plan di gobernacion cu ta bay inclui su ideanan pa un economia revolucioniario, incentive fiscal pa e hobennan y kita e red-tape enorme cu tin pa por haya incorpora compania nobo y haya permisonan necesario pa por cuminsa opera, Joselin Croes a duna di conoce.

Top