Di acuerdo cu MEP Gabinete Mike Eman ta nacro-complaciente

E guera mahos den seno di partido AVP y den seno di partido POR a rementa manera un postema.

Un Minister di Husticia totalmente for di control a cuminsa tira un cantidad di acusacion riba su ex colega Otmar Oduber, y sin cu e sa, a causa mas daño na su mes.

Minister Arthur Dowers a cuminsa cu yama Otmar Oduber pa payaso, pa gañado, pa hende ‘zielig’, cu ta practica politica barata y kier cumpra poder den husticia.

Eseynan t’e tiramento di lodo cu ta tipifica e partido berde, y awor ta un guera interno entre nan cu nan, segun MEP den un comunicado.

 

Pero e Minister no a lage t’eynan. E Minister a lansa acusacionnan serio contra Otmar Oduber di deliberadamente ta droga muchanan!

Dowers a acusa Otmar Oduber di duna e muchanan den su gruponan di Carnaval droga y alcohol pa despues nan sali na estado.

El a acusa Otmar Oduber di ta organisa conciertonan pa duna hobennan XTC, un droga cu ta causa dañonan hopi serio na mucha inocente.

Hasta el a acusa Otmar Oduber di ta organisa concierto pa na forma structura trafica den droga. Pasobra segun Dowers, e mes tabatey y nan a confisca hopi droga.

 

Kico tur esaki ta bisabo? Esaki na prome lugar ta mustrabo con na forma structural Gabinete Mike Eman a desgracia nos hobennan durante 7 aña, pero mas aun e ta mustrabo con Mike Eman ta na cabes di un Gabinete cu ta tolera narco traficacion.

Haciendo Mike Eman asina un narco complaciente. Ta un berguensa cu Mike Eman ta scucha e acusacionnan aki, y ta sinta keto sin bisa nada.

Confirmando cu Mike Eman y henter su Gabinete ta narco complaciente.

 

Si Mike Eman of cualkier miembro di su Gabinete ta sinti cu nan NO ta narco complaciente, nan mester sali y distancia nan mes di Minister Arthur Dowers su acusacionnan serio.

Si ningun di nan distancia nan mes y condena e expresionnan di Minister Dowers, nan tur ta complice, di acuerdo cu MEP den su comunicado.

 

 

Top