Di acuerdo cu MEP, strategia di desesperacion di AVP: Sembra odio contra MEP

Partido AVP a drenta campaña electoral den desesperacion. E biaha aki cu conseheronan Colombiano. Nan sa cu nan dianan ta conta y e doñonan di partido ta sinti cu nan ta perdiendo poder.

Esaki ta pone cu pa partido AVP e strategia ta di ta lomba contra muraya y ta den estado di desesperacion, segun MEP den un comunicado.

 

E prome instruccion cu a bay pa candidato y campañadornan di AVP ta pa mata e colebra na su cabes. Kiermen: No un campaña ofreciendo solucion, sino un campaña di caba cu e cabes di partido geel Evelyn Wever Croes. Esaki ta algo confirma di paden den e curason di partido berde y cual ya tur hende por a nota su efecto caba.

 

Bo ta mira AVP conbibi cu e dolornan den pueblo? No! Bo ta scucha AVP brinda solucion p’e problemanan den nos comunidad? No!

Bo ta mira candidatonan ta debati cu argumento riba e “issues” importante den nos pais? No!

Unico cos cu bo ta mira y scucha ta con tur candidato y campañador di AVP ta tira lodo riba lider di MEP Evelyn Wever Croes.

E cancion eterno di demonisa su tata y su famia, hasta su ruman defunto. Lastra hende cu no tin nada di haber cu politica simplemente pa sigi instruccion di lider di AVP Mike Eman.

 

Importante ta pa tur hende ta alerto p’esaki, segun MEP.

Especialmente p’esnan cu ta simpatisa partido MEP no cay den e trampa di AVP tambe di cuestiona liderasgo di MEP. Y ta haci esaki a base di mentira.

Mike Eman kier cuestiona liderasgo di Evelyn Wever Croes siendo cu Mike Eman t’e peor lider cu e pais aki a conoce.

Mike Eman a faya como lider y pesey kier daña imagen di otro cu lider cu mentira.

 

Evelyn Wever Croes ta mucho mas lider cu Mike Eman. Evelyn Wever Croes a studia dos titulo y a traha mas di 10 aña como hefe na Departamento di Belasting y despues mas di 10 aña den sector priva como experto den belasting y abogado.

Un carera impresionante cu Mike Eman no tin

Banda di esey Evelyn Wever Croes ta mama y esposa, a dedica su mes mas di 20 aña na trabounan social y caricativo y di Misa. Algo cu tampoco Mike Eman no tin.

 

Y por ultimo Mike Eman a bergonsa tur hende na Aruba cu su actitud swak contra Hulanda, mientras cu Evelyn Wever Croes a demostra cu e no tin miedo di Hulanda.

Evelyn Wever Croes ta defende e pueblo aki mescos cu un mama ta defende su yiunan. E pueblo na prome lugar.

En bista cu e escogencia entre Evelyn Wever Croes y Mike Eman ta masha facil pa haci y Mike Eman sa cu e ta perdi den esaki, awor ta purba bruha mente di hende cu mentira.

Pueblo , sea alerta , ora nan drenta bo cas, no permiti nan yena bo cu odio contra MEP ni Evelyn Wever Croes. Djies puntra nan pa nan plan, pa nan vision, pa nan solucionnan. Sea alerta! T’e apelacion haci pa MEP.

 

 

Top