Di acuerdo cu MEP: Tur candidato riba lista di MEP a pasa proceso di screening riguroso

Candidatonan di MEP ta integro

 

Den un campaña electoral semper mester tene cuenta cu oponentenan ta usa tur recurso pa mancha nomber di otro. E dicho “porco sushi ta busca muraya limpi pa frega su curpa”, ta aplicable.

Partido MEP a tuma nota di atakenan fuerte di oponentenan di AVP contra cierto candidato riba nos lista.

Riba esaki MEP mester enfatisa cu tur candidato cu a figura riba su lista, a pasa un proceso di screening riguroso. Caminda tabata posibel, a confirma esaki cu screening cu cierto candidato a pasa den nan trabou.

 

Tur esaki a conduci n’e mihor lista p’e eleccion aki, di hende homber y hende muher cu ta pone nan conocemento y experiencia disponible pa rescata nos pais.

Tur candidato ta tene cuenta cu unabes cu nan a drenta den politica, oponentenan di AVP ta conoci pa tira hopi lodo. Esaki ta pasobra nan no por bay den debate na nivel, y mesora mester tira lodo, segun MEP.

 

Diripiente tur hende ta pedofiel! Hasta esnan cu e propio Minister Dowers a duna nan posicion halto den Gobierno. Djis puntra bo mes si Gobierno di AVP lo a apunta nan riba e posicionnan ey, si nan lo a comete algo contra ley!

Puntra bo mes si nan tin tanto “prueba” di cosnan ilegal, pedofilia, rape, ladronicia, dicon nan no a bay Ministerio Publico!

E contesta ta simple: Pasobra nan ta gaña, y pasobra unico meta cu nan tin ta mancha nomber di otro.

 

Si pa por a ocupa un posicion halto den Gobierno of den comunidad, e candidato a pasa un screening riguroso hasta di seguridad nacional, ta absurdo pa oponentenan awor cuestiona esaki.

E tipo di acusacionnan aki ta mustra riba un realidad: AVP ta desespera, y no tin argumento pa gana ningun debate.

Pesey ta recuri na sushedad y ataca hende. Esaki ta di lamenta pasobra inecesariamente ta daña nomber di hende.

MEP ta hibando un campaña electoral di nivel, cu respet y treciendo solucionnan padilanti. Y nos lo no desvia y cay den e campaña sushi di AVP.

 

Top