Di acuerdo cu Parlamentario Chris Romero (MEP): Pobresa na Aruba ta birando alarmante

E realidad cu nos ta bibando na Aruba na aña 2017 ta cu tin hopi pobresa scondi, y e gran parti di e personanan aki tin miedo of berguensa pa sali y bisa cu nan mester ayudo. Nos mesun hendenan tin un impresion robes di locual ta trata pobresa, segun Parlamentario Chris Romero.

 

Ora nos uza e palabra pobresa, nos ta pensa hopi lihe riba locual nos ta wak na television.

Pero pobresa na Aruba ta ora un mucha ta bay scol tur dia cu hamber, pero tambe sin nada di come. Pobresa na Aruba ta ora bo tin cuater diferente famia bibando bou di e mesun dak pasobra nan no tin manera pa busca nan mesun luga. Pobresa na Aruba ta ora bo mira casnan cu ta pasa lunas sin awa of coriente, y hopi biaha sin niun di dos.

 

Hopi biaha nos tin e tendencia di pensa cu pobresa na Aruba ta algo cu ta afecta solamente e comunidad stranhero riba nos isla, pero no bou nos mesun hendenan. E pensamento aki ta uno robes y e cifranan oficial ta confirma e existencia di pobresa bou di nos Arubianonan, e Parlamentario ta mustra.

 

No por ta posibel cu den aña 2017 ainda tin cosnan asina ta sosode aki na Aruba. Na Parlamento mocionnan a keda entrega pa yuda NGO´s pa por cumpli cu e demanda grandi di cuminda cu mester pa yuda studiantenan cu ta den necesidad alimenticio, pero lastimamente te cu awe nada a keda haci.

 

Pa loke ta trata e problematica di famianan sin awa na nan cas, nos di fraccion di MEP a entrega un mocion caminda ta propone pa instala un reducer den e liña di awa p’asina controla y reduci e fluho y di e manera aki un famia cu debe nunca por keda sin awa. Teniendo na cuenta si cu cada ken lo keda cu e obligacion di cumpli cu nan debernan.

Den e materia aki Gobierno a priminti hopi, pero no ta haciendo nada pa bin cu solucion of ayudo pa cu e situacion di famianan den necesidad, Parlamentario Romero ta remarca.

 

Tin dos grupo di atencion pa loke ta pobresa na Aruba: hobennan y pensionadonan.

Bou di hobennan ta trece hopi mas problema acerca ya cu nan lo busca un manera of otro, sea bon of malo, pa yega na nan necesidadnan y aki hopi biaha ta unda criminalidad ta bira un caminda fasil pa nan cana. Desempleo entre nos hobennan ta conduci na criminalidad y hopi otro problemanan social cu ta nos mes mester bay atende cu nan despues.

 

Pensionadonan ta keda un grupo vulnerabel tambe. Nan a traha full nan bida pa por gosa di nan pensioen, y awor tin cu pasa den duro sin cu nan curpa ta duna pa nan por yuda nan mes.

E reto no ta bay ta facil, pero nos mester por logra cu un dia nos lo por elimina pobresa for di Aruba por completo, Parlamentario Chris Romero a declara na final.

Top