Di acuerdo cu Parlamentario mr. Juan E. Thijsen (MEP): AVP cu vision robes, prioridadnan robes, incapacidad y corupcion a stanca nos economia y a mata comercio local

Parlamentario mr. Juan E. Thijsen a tuma nota di publicacionnan di Banco Central di Aruba confirmando cu nos economia no ta bayendo bon. Un caida di -0,5 pa 2015 y -0,2 pa 2016.

Esaki, segun Parlamentario Thijsen, no ta nada straño mirando e mal trabao di Gabinetenan Mike Eman cu ya a conoce su di tres Minister di Economia.

Mike Eman a purba cu Michelle Hooyboer Winklaar, despues cu Mike de Meza y actualmente Richard Arends. E Parlamentario ta di opinion cu vision robes, prioridadnan robes, incapacidad y corupcion di Gabinetenan di Mike Eman a stanca nos economia y a mata comercio local.

 

Mike Eman como lider di nos pais a scoge pa pusha e economia di Aruba a travez di Gobierno mes hincando placa den infrastructura di nos pais. Esaki a bay den careteranan, brug, plazanan y trotoir tur caminda.

Macro economicamente e inversion dor di Gobierno den infrastructura no tabata hopi.

Raportnan ta indica cu solamente un 1% di su budget a ser inverti den infrastructura.

E inversion cu bo ta mira a bin grandemente for di placa Gobierno a compromete su mes (Hospital, Green Corridor) pa paga bek como debe di 30 aña. E empleo cu ta ser crea ta temporalmente y no ta trabaonan fiho.

 

Un otro soño di Mike Eman pa haci Aruba liber di fossil entrante 2020 tambe a resulta un fracaso apesar di gasta hopi plaka den organisa conferencianan y trece invitadonan caro bin papia.

Nos por mira diferente proyectonan y buya di Mike Eman no a resulta.

Ainda na WEB tin e bus electrico para ta frustia.

Parlamentario Thijsen ta kere cu Mike Eman no a sa di planea su vision. Berdad e desaroyo di energia alternativa lo ta bon pa Aruba, y su preparacion lo mester a cuminsa cu educacion, leynan, etc. Locual Mike Eman no a haci.

Ta te recien por a wak TNO haci algo pa cu energia solar den educacion na scolnan cual, segun Parlamentario Thijsen, ta algo positivo. Si bo wak bon loke Mike Eman a haci ta inverti pa mundo bira consciente di energia alternativa, pero ya caba e mundo y hasta Aruba ta consciente.

 

Un otro soño di Mike Eman di haci Aruba un hub entre Europa y America tampoco a duna ningun empleo y no a amplia e comercio local. E Parlamentario di MEP ta kere cu pa Aruba ta miho promove comercio local pa haci negoshi cu tanto Europa y America.

Pero e trato di Gabinetenan Mike Eman tabata masha mal mes p’e comercio na unda obranan publico a causa hopi ciere di negoshi y perdidanan grandi cerca e comercio. Ta bin acerca cu Gobierno di AVP ta masha corumpi y esaki ta stroba e comercio di bay dilanti.

 

Profesor de Vries a skirbi den un raport pa Universidad: “Het algemene functioneren van de overheid, haar relatie met het bedrijfsleven en de informatievoorziening door de overheid wordt steeds als net niet voldoende beoordeeld”.

Pa Parlamentario Thijsen, ta resalta e mencion den e raport di “vriendjespolitiek, smeergeld en corruptie.” Cu esaki ta sosode nos por a mira den e dia aki.

 

P’esey mes Parlamentario Thijsen ta bisa cu a yega e momento pa para e bagamunderia aki y pone un Gobierno cu bon vision, bon prioridadnan, capacita, no corupto y cu e mentalidad pa yuda hiba nos comercio dilanti tanto localmente como yuda nan yega den exterior.

Y di acuerdo cu e Parlamentario, su persona y partido MEP ta cla p’e cambio sin miedo.

Aruba merece miho!

Top