Di acuerdo cu PDR Alonso Tromp no ta miembro di PDR y por si acaso e miembrecia a wordo termina

Despues di a ricibi carta oficial cu PDR y sr. Andin Bikker a distancia nan mes di sr. Alonso Tromp, y Alonso Tromp a bay radio y na un forma hopi baho a sigui instiga di lo ta “miembro”.

Sr. Alonso Tromp a admiti publicamente cu el a rabia y ta wordo dirigi dor di su frustracion cu e no por a haya siguransa riba un puesto riba lista di POR.

 

Den e proceso el a lansa un hala di mentira e.o. cu lo a haci’e promesanan di number riba lista di POR: Ban ta serio, p’e number dos cu e tabata ocupa riba lista di PDR el a admiti cu su resultado no tabata alentador, despues ela bira inactivo pa mas cu 3 aňa y mey den politica y awor e ta bin ta demanda number y puesto riba lista di POR?

En todo caso ni sr. Alonso Tromp ni ningun di esnan cu e ta pretende di representa den e grupo chikito cu el a malinforma pa firma un blanco spreadsheet, no ta miembro conforme e statuutnan.

 

Pesey a manda notificacion urgente cu nan supuesto “miembrecia” ta wordo considera como termina, por si acaso cu nan lo por ta “miembro”. Ya cu Alonso Tromp y esnan cu el a malinforma no ta miembro y si tabata miembro mes nan miembrecia mester wordo considera como termina, nan actonan mal intenciona di yama “reunion” etc. ta sigui completamente sin base, y no lo wordo reconoci.

 

Ta di lamenta cu Alonso Tromp den su afan pa puesto y sin ta activo den politica desde 2013 ta cay den trampa di partidonan opositor (cu lo a priminti’e puesto riba lista) y ta malusa un grupito inocente pa su propio interes personal.

Loke ta ironico ta cu Alonso Tromp ta pretende di ta para p’e cumplimiento di e statutonan, pero solamente ora ta cumbini’e, paso awor diripente el a descubri statuut, asina mes cu e no ta miembro y en todo caso nunca a cumpli cu obligacion di un miembro.

 

Ta conoci cu Camara di Comercio ta un organo cu ta scrutina tur persona, compania o instancia cu ta prentende di registra cambionan n’e registro na Camara di Comercio y cu den e eventual caso aki tambe esey lo t’asina cu lo exigi di Alonso Tromp mescos cu cualkier otro persona of instancia cu ta yega eynan cu intencion di registra cualkier cambio di e registro.

Pues si Alonso Tromp ta pretende di tin supuesto rason pa purba un “hostile take over” di PDR completamente di mala fe, basa riba interesnan personal y obviamente dirigi pa partidonan opositor, e caminda pa Corte ta habri.

Historia ta yena di esnan cu ta purba yega na of kibra cosnan cu nan no a crea, su mala fe y energia destructivo no lo wordo recompensa, segun PDR den un comunicado.

 

 

Top