Di acuerdo cu Presidente di ATIA, Ronald van Trigt – Burocracia gubernamental, tambe exigencianan di banconan comercial, ta strobe economia di Aruba

Presidente di ATIA, Ronald van Trigt ta sostene maneho di Banco Central cu tin su reglanan rigoroso, cu sigur ta positive. E otro banconan ta comercial, y por sinti cu nan a bira mas estricto, debi n’e presion cu tin riba nan, segun Presidente di ATIA, pero e ta kere cu asina mes banconan mester por duna cierto preferencia, sigur esnan cu kier establece nan negoshi na Aruba.

 

Dicho comerciantenan merece di haya cierto beneficio ora cu nan kier establece cierto negoshi na Aruba. P.e. den pasado ATIA mes a papia di kier un knowledge economy, unda lo atrae e mihor celebronan pa bin traha na Aruba, pero esnan cu kier bin bek, y si mira tur e burocracia cu nan tin cu paga prome di por habri un negoshi, ta un caminda di Calvario bo tin cu cana.

 

Banda di esey, si bo kier habri un cuenta na banco, bo mester tin un vergunning di Departamento Economico. Procesonan cu ta dura lunas.

ATIA semper a boga pa tin un centro, unda tur esnan cu kier habri un negoshi, ta bay y habri su negoshi basta liher.

E frustracion ta tambe pa un inversionista di afo, cu ta un demotivacion grandi y ta prefera di bay un otro isla den Caribe, cu no tin tur e burocracia cu Aruba tin, segun Ronald van Trigt.

 

Tin compania cu kier bin cu cierto ideanan nobo, cu kier bin cu talento, y hopi biaha cu talento Arubiano mes, p.e. un Arubiano casa cu un stranhero, pero p’e señora haya un permiso pa nan yiunan por bay scol na Aruba, ta dura lunas. E hendenan aki e ora ta prefera bay bek. E cosnan aki ta stroba comercio enormemente.

Nos hendenan tin un cantidad di barera pa por haci negoshi na nan propio pais. No por y aki sigur mester bin cambio si nos kier mehora nos economia, Presidente di ATIA a duna di conoce.

 

E asunto di haya permiso ta un asunto serio. Cuanto negoshi no ta busca yiunan di tera pa traha, pero no por haya. E ora mester busca esaki den exterior. Semper ta tende cu yiu di tera t’e promenan pa haya trabao, esey ta berdad, pero no ta tur trabao un yiu di tera por haci, segun Ronald van Trigt.

Pa nos por sigui bay dilanti, henter e proceso di permiso mester bay ser re-evalua y mester bira mas eficiente y mas efectivo.

 

Otro obstaculo grandi t’e leynan di labor, cu ta strobe comercio di crece. Un comerciante semper

kier tuma riesgo. Cuanto biaha comercio ta wordo pidi pa tuma esnan cu tin problema social, esnan cu a haya nan den problema cu husticia den pasado, pa yuda nan, pero e yudanza aki no por bin di un solo banda, segun Presidente di ATIA.

Mester por adapta nos leynan laboral pa por duna e hendenan aki un oportunidad, pero tambe duna comercio un oportunidad tambe pa haya sa kende(nan) ta tuma na trabao, p.e. pa un periodo di 6 luna.

 

P’asina por traha hunto y e ora ey, comercio por emplea nan. Pasobra duna unicamente 2 luna di prueba no ta un motivacion pa emplea ningun hende, segun Ronald van Trigt.

Mester studia e eficienca den Gobierno, cu awor ta laga masha di desea. Mucho burocracia,mira p.e. pa haya un tereno na erfpacht, ta masha requisite e solicitante mester cumpli cu nan. Tur esaki ta stroba pa placa circula den economia di nos pais.

 

 

 

Top