Di acuerdo cu publicacionnan na Hulanda Inspeccion di Aviacion (ILT) a perde caminda complete

SCHIPHOL – Den e corant Hulandes, Telegraaf, nos a tuma nota di un critica riba Departamento di Aviacion Hulandes, (Inspectie Leefomgeving en Transport), alegando cu nan a perde caminda di nort.

Esaki t’e mesun departamento cu Secretario di Estado Hulandes, Sharon Dijksma a pidi pa haci un investigacion profundo di Departamento di Aviacion di Aruba y di Corsou y na mes momento, inspecciona InselAir Aruba y InselAir International.

 

Den corant Telegraaf, nan ta relata riba fayonan serio tumando lugar den e area aki, citando te hasta expertonan riba e tereno aki. Ta papia cu e departamento aki a ‘perde strea di nort’, ‘falta di conocemento’ y ta ‘leu di realidad’.

E mesun ILT aki ta pues esun cu basa riba nan conseho, Gobierno Hulandes a para tur nan personal di bula cu InselAir, y a convence Gobierno di Aruba y Corsou pa no permiti avionnan aki ‘pa bula te proximo aviso’.

 

Asina cu e raportahe a keda publica, a cuestiona seriedad di e instancia aki, esta di ILT.

Manera menciona, ILT ‘a perde strea di nort’. Tambe nan a cremencha, tin mucho poco conocemento y e reglanan gubernamental ta leu di e realidad diario’.

Ademas ta mustra cu ILT ta fayando na Schiphol (e Aeropuerto mas grandi y principal di Hulanda) y aeropuertonan regional.

“E supervision inadecua no ta beneficia seguridad, segun critica di e companianan areo y e instancianan cu ta interesa riba e tereno aki.

 

Vocero di KNVVL (Koninklijke Nederlandse Vereniging voor Luchtvaart) Ronald Schnitker ta bati alarma.

“E comprension cu aerolineanan ta malo. Esey ta conta tanto pa aviacion ‘grandi’ como esun ‘recreativo’ e vocero ta bisa. E inspectornan ta ‘invisibel’ y ta traha numa sin ningun tipo di consulta.

Varios piloto ta di acuerdo cu ne cu e inseguridad a aumenta. Ta haci mencion di un declaracion di un instructor cu kier keda anonimo, bisando cu na inspeccion, nan no tin ningun clase di conocemento mas di aviacion.

 

“E incompetencia ta birando un hilaridad, pero ta trata mes momento tambe di purba di evita accidentenan fatal. Ultimo tempo cos ta fayando. E reglanan mester wordo mehora.’

E Director nobo di ILT, Jacqueline Lamé ta bay drecha cos segun e articulo. E tambe ta di acuerdo cu inspeccion ta fayando, y cu segun un oficina externo, a traha un analisis di e puntonan fuerte debil.

Un reorganizacion ta na su lugar, Jacqueline Lame a declara na Telegraaf.

Mientrastanto Aruba ni Corsou no a haya un raport ainda di ILT di nan analisis haci di maneho di Aviacion Civil, y consecuentemente e avionnan MD di InselAir Aruba ta keda grounded.

 

 

Top