Di acuerdo cu relato financiero di AZV pa 2016, a constata cu gastonan di cuido a sigui subi, y ta mas halto loke a spera

Pa di 7 biaha consecutivo AZV a entrega prome cu 1 di april e relato financiero di AZV na Minister di Salud Publico y na Minister di Finanza, respectivamente dr. Alex Schwengle y mr. Angel Bermudez.

E relato anual 2016 ta contene un declaracion di aprobacion di e accountant externo, tanto pa loke ta e exactitud di e documento como tambe e legitimidad. Bo persona por download e relato anual 2016 for di e website www.azv.aw.

 

Gastonan di cuido mas halto cu a spera

Compara cu 2015 e gastonan total a subi cu 5,2%. Esey ta un crecemento mas halto di loke a spera.

Esaki ta wordo ocasiona primordialmente dor di un calculacion demasiado abou di e obligacionnan cu mester a cumpli cune pa loke ta cuido medico den exterior. Entre tanto a tuma pasonan pa evita e riesgo aki den e siguiente añanan, según AZV.

 

Apesar di e crecemento fuerte y inespera den 2016, e crecemento promedio di e gastonan den e ultimo 5 añanan ta keda modera: E periodo 2012-2016 ta conoce un crecemento anual promedio di rond di 2,7%.

Den e mesun periodo e inflacion anual tabata un promedio di -0,5% y e crecemento anual promedio di e poblacion tabata 1,6%.

 

Contribucion di pais Aruba ta keda baha

E parti di e contribucion di pais Aruba den e financiamento di AZV den aña 2016 un biaha mas a baha.

Den e periodo desde di introduccion di AZV e parti di e contribucion di pais Aruba den e financiamento a baha alrededor di 60% den 2001 pa 13% den 2016.

 

E disminucion (bahada) di e parti di e contribucion di pais Aruba a bay man den man cu e aumento di e parti di entradanan di prima y di e impuesto ‘bestemmingsheffing AZV’ (BAZV).

 

P’e siguiente añanan te 2020 AZV ta tene cuenta cu un aumento promedio di alrededor 4%.

E aumento den e crecemento anual aki compara cu e periodonan anterior tin su causa den e desaroyo di iniciativanan nobo manera e renobacion y construccion di hospital, e introduccion di cardiologia intervencionista, e ampliacion di capacidad di operacion den ImSan y e introduccion di radioterapia den ImSan.

 

Ki efecto e operacion gradual di e refineria lo tin rib’e entradanan di e prima y e BAZV no ta sigur ainda. P’esey mes e efectonan aki por lo pronto no a wordo calcula den e proyeccionnan.

Den caso cu e entrada di prima y BAZV keda igual, e expectativa ta cu e parti di e contribucion di pais Aruba lo bolbe subi den e siguiente añanan.

 

Top