Di acuerdo cu relato mensual di maart, Banco Central ta observa cu Activo domestico netto y reserva di divisa netto a subi

Pa loke t’e desaroyo monetario, Banco Central a duna di conoce cu den e luna di maart 2017, e cantidad di placa den circulacion a subi cu Afl. 83.4 miyon te na Afl. 4.180,9 miyon, compara cu februari 2017. Esaki a resulta dor di subidanan den e activo domestico netto (+Afl. 52,2 miyon) y den e reserva di divisa netto (+Afl. 31,2 miyon).

 

E subida den e activo domestico netto a surgi dor cu credito domestico a subi (+Afl. 90,5 miyon), mientras cu transaccionnan no relata na credito a mengua (-Afl. 38,3miyon).

E caida den transaccionnan no relata na credito a wordo causa principalmente dor di subidanan den e asina yama “shareholders’ equity” y “other liabilities” y tambe transaccionan di clearing.

 

Credito domestico a expande, como resultado di subidanan den tanto credito bancario netto n’e sector publico (+Afl. 88,3 miyon) como credito bancario n’e sector priva (+Afl. 2,2 miyon).

E aumento den credito bancario netto n’e sector publico ta relaciona principalmenta cu un bahada den depositonan di Gobierno (-Afl. 82,1 miyon).

E crecemento di Afl. 2.2 miyon den credito n’e sector priva a resulta for di mas hipoteca pa vivienda (+Afl. 7.4 miyon) y credito na empresa (+Afl. 1,9 miyon), mientras cu credito na consumidor a baha (-Afl. 7,1 miyon).

 

E crecemento den e reserva di divisa netto di e sector bancario ta debi na compra netto di divisa for di publico (+Afl. 272.8 miyon), principalmente relaciona cu entrada for di turismo y inversionan directo.  Esaki a wordo parcialmente mitiga pa benta netto di divisa na publico (-Afl. 241.6 miyon), primordialmente relaciona cu pago netto pa importacion di mercancia, e asina yama ‘income account’ y otro servicionan.

 

INFLACION

E nivel general di prijs, cu ta wordo midi dor di e indice di prijs di consumo, a registra un bahada di 0,1 porciento den e luna di maart 2017, compara cu maart 2016.

E contribuyente principal n’e caida aki t’e componente “Vivienda”, cual ta debi primordialmente na un reduccion den prijs di electricidad.

Tambe, e componente “Recreacion y Cultura” a contribui n’e bahada. Di otro banda, e componentenan “Transporte”, “Cuminda y bebida no-alcoholico” y “Restaurant y Hotel” a registra un subida.

Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,1 porciento compara cu maart 2016.

Pa loke ta trata e promedio anual di e tasa di inflacion, esaki a subi na -0,7 porciento na maart 2017, compara cu -0.8 porciento na februari 2017.

 

TURISMO

Na maart 2017, e cantidad di turista a registra 90.133 bishitante, cu tabata 18,1 porciento (-19.865 bishitante) menos cu na maart 2016.

E caida aki a resulta principalmente dor di 68.3 porciento menos turista di Latino America (-23.731 bishitante).

Di otro banda, e mercado Norte Americano a crece cu 7,4 porciento (+4.867 bishitante).

 

E caida den e mercado Latino Americano a wordo causa pa menos bishitante for di Venezuela (-23.924 bishitante of -85,3 porciento).

E subida den e mercado Norte Americano a resulta for di un expansion den bishitante for di Merca (+4.117 bishitante of 6,8 porciento).

E cantidad di turista crucero a registra un subida di 3.033 bishitante of 3,1 porciento te na 99.769 na maart 2017, compara cu maart 2016. E cantidad di barconan a baha for di 48 na maart 2016 pa 41 na maart 2017.

 

ENTRADA DI GOBIERNO

Na maart 2017, entrada di Gobierno a suma Afl. 100,8 miyon, cual ta Afl. 7,9 miyon mas compara cu e mesun luna di e aña anterior.

E crecemento aki a resulta di subidanan den entrada di impuesto (+Afl. 7,5 miyon) y den entrada no relata na impuesto (+Afl. 0,4 miyon).

E crecemento den entrada di impuesto ta relata principalmente na mas accijns riba gasoline (+Afl. 10.5 miyon), impuesto riba e asina yama “overdrachtsbelasting” (+Afl. 5,1 miyon), accijns riba tabaco (+Afl. 3,8 miyon), impuesto riba salario (+Afl. 2,9 miyon), benta di negoshi (B.B.O) (+Afl. 2,0 miyon) y impuesto riba divisa (+Afl. 1,2 miyon).

Di otro banda, bahadanan a wordo registra den entrada di impuesto riba ganashi (-Afl. 17,5 miyon), impuesto riba entrada (-Afl. 2,5 miyon) y vehiculo di motor (-Afl. 1,6 miyon).

 

Leave a Reply

Top