Di acuerdo cu Rene Herdé (AVP): Analisis di Banco Central ta mustra unda nos tabata y unda nos ta awe

Recientemente, a sali den un publicacion di e organisacion Hulandes “Follow the Money” riba re-apertura di e refineria, algun informacion di desaroyo economico, financiero y laboral di Aruba, cu den forma masha cla ta mustra atrobe unda Aruba tabata na fin di 2009 ora MEP a sali di Gobierno, con Aruba a sali for di e triple-crisis cu MEP a bay laga nos pais aden y unda nos ta awe, segun Rene Herdé di AVP.

 

Den un di e graficonan di Banco Central ta ilustra den forma masha cla con economia di Aruba a cay entre 2006 y 2010. E grafico ta mustra cu no ta solamente e refineria, pero tambe turismo acausa e caida grandi aki. E ponencia cu MEP ta ripiti masha hopi cu turismo tabata bay bon bou di nan gobernacion, ta wordo refuta atrobe cu e preubanan aki!

E grafico aki ta mustra tambe cu den e mes un periodo cu economia (incluso turismo) a cay mas abou cu culakier otro pais di mundo, cu desempleo a aumenta barbaramente y e deficit di Gobierno a subi, sr. Herdé ta splica.

 

AVP semper a mustra rib’e realidad amargo aki cu MEP a bay laga nos pais aden. No pa keda pega eynan, pero pa marca e punto caminda gobernacion di AVP a cuminsa trece cambio.

Rib’e grafico ta wak bon cla con for di momento cu AVP a drenta Gobierno y a cambia forma di goberna nos pais, cu economia a cuminsa crece, cu turismo a cuminsa crece den cantidad y den calidad, y cu desempleo a cuminsa baha. Cifranan di CAFT ta confirma apart di esaki cu e deficit riba presupuesto tambe ta bahando y a casi yega e punto di 0% di GDP, sr. Herdé ta mustra.

 

PROGRESO COMPARTI

E analisis di Banco Central ta confirma mas cla cu nunca, con desaroyo di nos pais a cambia cu Gobierno di AVP. Aki no tin espacio pa discucion. Hechonan aki ta papia pa nan mes!

E pregunta si y e progreso di nos pais a yega na pueblo. E contesta ta si!

E pruebanan ta demostra esaki tambe. A crea mas cupo di trabou cu nunca antes y e refeneria apenas a cuminsa traha, sr. Herdé ta enfatisa.

 

E fortificacion di entrada di empleadonan publico y maestronan di scol, cu re-introduccion di indexering, e rescate di e pensioen di mas cu 20 mil trahado y pensionado, e aumento di pensioen dos biaha cu e reparatietoeslag, e reparatietoeslag for di caha di Gobierno pa trahadornan cu e salarionan mas abao, e aumento di onderstand y e reduccion di prijs di awa y coriente, e mehoracion di barionan y casnan den barionan, e instalacion di luznan den bario, e renobacion di centronan di nos ciudadnan, e renobacion di scolnan na cantidad, tur ta ehempelnan con e maneho di Gobierno di AVP a percura pa e progreso cu Aruba a conoce yega directamente na e casnan di famia, sr. Herdé a amplia.

 

Pero nos sa miho cu niun otro cu nos trabou ainda no ta cla. Tin casnan y barionan cu ainda no a sinti e progreso manera nan ta spera. Ainda tin mucho hende sin trabou. Ainda tin cambionan pa haci den enseñansa y den salubridad, den servicio di Gobierno y den seguridad di nos pais.

Ta p’esey, contento di por a saca nos pais for di unda MEP a bay lag’e, nos ta sigui traha pa hiba Aruba, na unda nos kier pa e ta! Caminda nos kier pa TUR hende ta!, Rene Herdé di AVP a duna di conoce.

Top