Di acuerdo cu Rene Herdé (AVP): Loke a sosode na Rooi Frances no mag sosode hamas

“Loke a sosode na Rooi Frances siman pasa no tin mas di sosode hamas. Hamas! Nos ta contento cu director di DOW mes ora a reconoce e eror grandi di esnan responsabel den ehecucion di e trabou. Pero nos mester bay mas leu cu esey. Mester haci tur cos posibel, na tur nivel di Gobierno y contratista, pa evita ripiticion di erornan asina. Cada biaha cu algo asina sosode ta nos Aruba ta perde”.

 

Esey tabata e reaccion di desaprobacion y desilucion di Rene Herdé den fin di siman.

Pero tambe el a urgi pa cambio den e forma di aproba y ehecuta proyectonan di infrastructura, sea priva of publico.

 

NATURALESA BUNITA Y ESENCIAL

“E naturalesa di nos isla no ta solamente masha bunita, pero tambe esencial y indispensabel pa nos sobrevivencia. Niun hende por imagina un Aruba sin su mata y bestianan, sin su mondi, areanan rigido y playanan di santo blanco rondona di lama blauw.

Rooi Frances en particular tin un bunitesa remarcabel y netamente pasobra e matanan ta crece liber y cubri e caminda. E caracter y bunitesa singular di Rooi Frances so caba ta motibo pa a actua cu masha cautela den tur cos cu kier haci den e area special aki”, asina Rene Herdé a sigui bisa.

 

CAMBIA

Ta bon pa wak cu director di DOW mes a bisa cu mester bin cambio den e forma cu DOW ta anda cu proyectonan aki. Pero e cambionan mester inclui hopi mas cu loke ta responsabilidad di DOW.

 

“E cambionan cu mester wordo introduci mes ora, mester inclui reglanan nobo pa kico tin mag di haci cu tereno den naturalesa, reglanan nobo pa aprobacion di proyectonan sea priva of publico, instruccionnan mas specifico ora di ehecuta proyectonan sea di construccion of di trabou di limpiesa; mester tin supervision continuo di superiornan di DOW ora di ehecuta proyectonan di infrastructura y limpiesa. Tur esaki mester ta parti di un consciencia permanente cerca tur hende riba nos isla cu no por anda cu nos naturalesa comosifuera cu por haci kico cu hende kier of ehecuta trabou con cu ta. Esaki ta rekeri educacion continuo di hoben y adulto, tur hende den construccion y den limpiesa di nos isla”, e miembro di AVP ta splica.

 

Rene Herdé a bisa cu casonan similar den pasado y e caso tristo aki ta nifica cu ainda e consciencia cu mester haci tur cos pa cuida y promove nos naturalesa no ta loke nos kier aki pa sigura un desaroyo balansa entre construccion y preservacion di naturalesa.

“Nos no lo descansa te sigura cu tur caminda, tur hende y tur ora ta anda cu nos naturalesa cu respet y responsabilidad”, Rene Herdé a conclui.

Top