Di acuerdo cu Rene Herde´ (AVP): Loke ta determina resultado den politica no ta ken, pero ta kico

Siman pasa e patidonan PDR/MEP a entrega un “mocion di desconfiansa” contra di Minister di Husticia Arthur Dowers. Sinembargo, durante di henter e debate riba criminalidad cu nan mes a pidi p’e, oposicion no a presenta critica rib’e MANEHO mes.

Cu excepcion di e idea di PDR pa uza alarmanan di shete euro, nan no a presenta niun alternativa pa e MANEHO.

 

En bes di critica e maneho, oposicion a señala cosnan cu a y ta sosode y nan a critica e Minister mes. Logicamnente ta e Minister ta esun cu ta tuma desicion y duna direccion. Pa esey e tin cu duna cuenta na pueblo y na Parlamento.

Pero oposicion no a presenta nada cu nan lo haci diferente cu loke ta haci awor. Di Parlamento ta spera cu nan ta bay mas leu cu djis señala kico a sosode. Di Parlamento ta spera cu nan ta analisa e MANEHO di e Minister y presenta alternativanan pa kico e no mester haci y kico si lo mehora e maneho. Esey oposicion no a haci.

 

  1. o. p’esey Rene Herdé di AVP a bisa cu lo comete un eror historico si aproba e mocion di desconfiansa sin cu por bisa kico ta malo y kico tin cu drecha.

 

E MANEHO, NO E PERSONA

Den combersacion cu Rene Herdé, el a splica pakico ta e MANEHO y no e persona cu mester wordo critica.

Segun Herdé, “Bo no ta entrega un mocion mocion di desconfiansa contra di niun Minister di niun Gobierno facilmente. Esey no ta e funcion di un Parlamento. Bo ta hacie si Bo no ta di acuerdo cu e maneho. E ora bo ta mustra kico ta malo den e maneho y con pa mehor’e.

Si bo no haci esey e pregunta ta keda, ta pakico bo kier pa un Minister baha. E regla mester ta semper cu bo ta exigi pa un Minister baha ora cu e tuma decisionnan robes of contra ley of comporta contra moral y etica. No tin otro motibo. Si bo entrega un mocion di desconfiansa pa motbonan politico electoral, anto Bo ta mal uza Parlamento!”

 

Segun Rene Herdé, oposicion no por a mustra kico tin cu cambia den e maneho di e Minister. Oposicion a bisa den pasado cu mester inverti mas placa den husticia. E realidad ta cu for di 2010 Gobierno y fraccion di AVP den Parlamento a aumenta e presupuesto di husticia cu 70 miyon florin! Fraccion di AVP a bisa cu mester habri scol di Polis bek y Gobierno a habri e formacion di mas Polis. Polis a pidi pa duna nan mas autoridad pa haci envestigacion y actua preventivo.

 

AVP a percura pa aproba e ley (BOB) pa duna polis autoridad adicional. Pueblo a pidi pa aumenta castigonan y AVP a percura pa esey. Pueblo a pidi pa uza mas tecnologia den combati criminalidad, manera camaranan. Gobierno a pone camara y ta bay sigui pone camara na mas luga.

Pueblo a pidi pa haci entrada legal y ilegal pa Aruba mas stricto (“controla fronteranan”), e Minister di husticia pa haci esey. Oposicion a pidi pa instala un radar, pero nan a lubida cu ta nan propio Gobierno (MEP) a laga desmantela e radar. Awor ta e radar di Guardacosta di Reino ta haci un bon trabou den cuida nos lamanan. Ta p’esey tur dia Polis ta gara ilegalnan cu drenta Aruba via lama y ta sacanan di Aruba atrobe. A bin ripara cu mayoria di atraco ta wordo cometi dor di hende di Aruba mes. Polis ta soluciona mayoria di e atraconan aki y husticia ta cera e criminalnan aki.

Pa hobennan cu por cay den criminalidad AVP a crea e “Formacion Social” cu ta duna nan oportunidadnan nobo riba un bon caminda.

 

Rene Herdé ta conclui bisando, “Riba e maneho oposicion no a presenta nada cu no a haci caba. En bes di presenta un otro maneho, nan a ataca e Minister mes, sin bisa kico un otro Minister lo mester haci diferente. Ta eynan nan a y ta sigui faya.Ta p’esey nos lo a comete un eror grandi pa sostene un mocion asina. Tanten cu den politica hende ta keda ataca e politico y no kico e ta bisa y haci, oposicion ta keda practica e politica tradicional mas baho y inefectivo cu tin.

Nan mester siña cu den politica no ta ken ta maneha ta conta na prome luga. Ta kico cu bo haci ta conta! AVP a y ta sigui uza tur instrumento legal, tur idea of proposicion di ken cu present’e cu por yuda mehora bida na Aruba. Pasobra nos tur stima nos pais y nos sa cu no ta ken pero ta kico ta conta!”

Top