Di acuerdo cu Secretario di Estado, Sharon Dijkstra: Hulanda no tin placa pa mantene InselAir na bida

Ayera tardi, na Oficina di VNO, Secretario di Estado, Sharon Dijkstra a duna un conferencia di prensa, unda el a labora riba e situacion di aviacion na Aruba y Corsou, pa loke ta InselAir.

Hulanda, cu aprobacion di Gobierno di Aruba y Corsou, lo interveni formalmente den e operacion di InselAir International (Corsou) como InselAir Aruba.

 

Esey ta haci cu e.o. ekipo di Inspector Hulandes e siman aki ainda lo biaha pa Aruba y Corsou pa conduci e inspeccionnan necesario riba e companianan menciona.

E Secretario di Estado Hulandes, a duna di conoce cu e avionnan actualmente ‘geground’, lo keda geground, cu t’e avionnan MD di InselAir Aruba.

Den un investigacion pre-eliminar haci, a constata deficiencia serio na Aruba como Corsou.

 

Pa loke t’e calidad di deficiencia, a menciona tambe cu e deficiencianan haya na Corsou ta mas pio cu esnan na Aruba.

E situacion na Corsou ta hopi mas preocupante, segun Sharon Dijksma.

 

Ta papia aki riba e supervision riba seguridad di avion mas tanto. E supervision na Aruba tambe a nota deficiencia, pero e problema na Aruba, ta mas bien uno administrativo.

Papiando di problema administrativo, tambe tin deficiencia unda cu no solamente papia di inspeccion di e avionnan riba plataforma, pasobra ey tin cosnan bon ta pasa.

 

Sharon Dijksma ta papia mas bien riba e sistema di control y e forma con ta controla y si e ta suficiente actualisa y modernisa.

Mirando cu no por tin duda riba e supervision riba seguridad di aviacion, a dicidi cu ambos Gobierno (Aruba y Corsou) pa bin cu un tipo di acuerdo cu ta encera cu Aruba como Corsou ta haya asistencia inmediato di Inspectornan Hulandes.

Y pa haya e mandato pa mantene supervision manera cu nan ta custumbra di haci na Hulanda.

 

Hulanda lo staciona Inspectornan Hulandes mas liher cu ta posibel na Aruba. E ta necesario pasobra na Aruba no tin buelo tumando lugar debi na ‘re-certificacion” di InselAir Aruba.

Di acuerdo cu e Secretario di Estado, e kier duna e Inspectornan Hulandes y Arubano e oportunidad pa termina e re-certificacion, cu tin cu conduci na un situacion positivo.

 

Un cos e representante di Gobierno Hulandes kier ta masha cla, cu Hulanda lo no inverti placa den operacion di un aeroliña priva. Lo no tin placa pa p.e. mantene InselAir na bida.

Top