Di acuerdo cu SIMAR Implementacion di Restructuracion Salarial di maestronan atrobe “on hold”

Segun planificacion e sistema salarial nobo mester a drenta na vigor for di 1 di januari 2017. Esaki despues cu na diferente ocasion a aplasa e fecha di implementacion caba.

SIMAR como “stakeholder” di e comision Restructuracion Salarial ta cuestiona e proceder di Minister di Enseñansa, sra. Michelle Hooyboer-Winklaar, ya cu tin cierto palabracion haci cu cualnan mester cumpli.

 

Un di nan t’e deber di informa tur partido concerni p’e implementacion por cana mas facil y sin incertidumbre.

N’e momentonan aki tur reunion di e comision ta para pa motibo cu Ministerio di Enseñansa mester duna contesta riba e preguntanan treci dilanti den Parlamento na luna di december, na momento di a trata e ley di restructuracion.

 

Te awe ainda e Ministerio no a duna contesta. Ultimamente e representante di SIMAR den dicho comision, a haci varios intento pa drenta den contacto cu Director di Departamento di Enseñansa, alabes Presidente di e proyecto, sin por a comunica cu su persona.

Tambe a aserca e representante di Minister den e comision, kende na su turno no ta duna informacion concreto pa cu un fecha di reanudacion di e trabounan.

 

Un otro palabracion haci den e comision ta cu ningun partido lo no sali cu informacion di implementacion riba nan mes y cu tur lo sali unanimamente na momento di implementacion pa evita mal comprendemento y mal informacion.

Minister di Enseñansa t’e prome yama pa duna informacion.

 

Por compronde cu trabounan ta andando y cu tin factornan cu por trece cambio den e fecha di implementacion. Loke SIMAR ta lamenta ta cu Minister no ta sali dilanti cu informacion concreto riba esaki, p’asina esnan concerni por ta na altura di e desaroyonan.

 

SIMAR ta spera cu Minister Hooyboer-Winklaar y su Ministerio por keda cla pronto cu contesta riba e preguntanan haci den Parlamento p’asina e comision por reanuda su trabounan.

Tambe ta di spera cu Minister por anuncia e fecha nobo di implementacion p’asina empleadonan den enseñansa por tin mihor bista riba kico Restructuracion Salarial ta ensera.

Top