Di parti di paciènte cu nan a manda di kashi pa muraya….. Corte no a aproba demanda di 300.000 florin contra SEHOS

WILLEMSTAD – Un caso cu tin algun aña andando caba den pasiyonan di Corte di Husticia Comun caba na aros y coco ora Corte Superior na Hulanda no a mira mérito pa trata e caso.

Ta trata di un paciènte cu a lucha largo y balente pa cobra 300.000 florin di daño y perhuicio serca su dokter di cas y SEHOS, pero su argumentonan no tabata suficientemente pisá.

 

Corte Superior luna pasá a duna su veredicto rechasando pa condena e dokter di cas y SEHOS.

Ta trata di un caso caminda un paciènte di Corsou a demandá SEHOS y su dokter di cas pe forma con nan a masacrá su problema di salú.

Nuebe aña pasá e paciènte a laga su dokter di cas examiné y kende a constatá cu e tin ambei.

Tres dia tras di otro e paciènte a bishita su dokter di cas te cu finalmente e mes a acudi na SEHOS pa haña asistencia medico di emergencia.

 

Den hospital un medico a evaluá cuanto purá (haci un triage) tin pa trata e caso y a mandé pa su dokter di cas.

E homber a harta di ta core di kashi pa muraya y a drenta avion bay Venezuela caminda nan a operé diferente biaha.

Na Venezuela nan mester a bisé cu tanto su dokter di cas como den hospital nan a haci fout y p’esey el a demandá SEHOS.

E paciènte a pèrdè e caso den promé instancia, el a pèrdè e caso den Corte di Husticia Comun y a rechasá e demanda pa SEHOS pag’e 300.000 florin.

 

Den Corte Superior na Hulanda tambe nan a rechasá su demanda pa falta di mérito y p’esey e homber a bay Casacion.

Aya nan a repasá historial di e paciènte, kende tabatin keho na su anus. E homber a hasta keha su dokter di cas serca Inspector di Salubridad, kende no tabatin palabra masha halagador pe dokter di cas di e paciènte.

Pero na final e homber a pèrdè tur caso y Corte Superior na Hulanda a decretá cu a sera e caso.

Top