Dia 31 di maart t’e di penultimo biaha cu nos mester paga p’e escandalo di garantianan di AVP

Dia 31 di maart 2017, Gobierno di Aruba pa di penultimo biaha lo mester bay paga un suma di 5.1 miyon dolar (9.2 miyon florin) y esaki relaciona cu e escandalo di e garantianan duna dor di AVP den e añanan 80, segun MEP den un comunicado.

Manera tur hende sa caba, durante Gabinete Eman I (1986-1988), un sin fin di garantia a ser duna n’e Mafianan Italiano y esaki relaciona cu e tres proyectonan hotelero Beta, Ramada y Plantation y cualnan tur a fracasa y laga den ruina atras.

 

DEBE DI 206 MIYON DOLAR

Hecho ta cu asina cu Gabinete Oduber a asumi mandato na november 2001, nan a haya nan mes confronta cu un sentencia di Corte Internacional na Den Haag caminda mester a paga di inmediato (‘uitvoerbaar bij voorraad’) un suma di $ 206.000.000,00 (206 miyon dolar) pa tur e bagamunderianan cometi pa Gabinete Eman y partido AVP.

Un suma astronomico cu a resulta imposibel p’e Gobierno di MEP paga e momento ey.

 

SOLUCION GARANTIANAN

Sinembargo Gabinete Oduber, por medio di Minister President Nelson Oduber y Minister di Finanza Nilo Swaen, no a sinta yora, pero cu curashi y determinacion a bay Italia, a negocia cu e General Manager di SACE, Giorgio Tellini y a logra un reduccion di e debenan di garantia cu 100 miyon dolar.

E acuerdo a ensera cu lo paga 55 miyon dolar cash y e restante lo wordo paga durante 15 aña largo – te cu 31 di maart 2018 – na un suma di 5.1 miyon dolar (= 9.2 miyon florin) tur aña.

 

Pues ayera 31 di maart tabata e penultimo bes cu nos mester paga e suma aki cu tabata fruta y resultado di un maneho descabeya y iresponsabel di Gobierno di Henny Eman y su consehero Mike Eman.

 

OTRO TRAGEDIA NA CAMINDA

Sinembargo otro aña maart – na momento cu caba di paga henter e debenan di garantianan aki – pais Aruba lo wordo confronta cu un otro tragedia di pago di bagamunderia cometi pa AVP, ya cu entrante 2018 henter comunidad lo mester bay cuminsa paga p’e debenan di e proyectonan PPP, cu ta suma na 90 miyon florin pa aña y esaki durante 25 pa 29 aña largo.

 

Pues asina por mira cu nos pais nunca mas lo por haya alivio di paga y sigui paga pa debenan cu AVP ta crea den forma descabeya na momento cu nan asumi gobernacion di nos pais. Conclusion di MEP ta: Debe, garantia y desaster financiero ta sinonimo na AVP!

Top