Dia International di Trabou Social 21 di maart 2017: Un yamada pa haci actonan di bondad spontaneo

Tur aña trahadonan social rond di mundo ta celebra Dia Internacional di Trabou Social. Riba diamars 21 di maart 2017, e departamento di Trabou Social y Desaroyo na Universidad di Aruba ta invita tur hende pa uza e dia pa haci actonan di bondad spontaneo (Random acts of kindess).

Un acto di bondad spontaneo ta un acto haci dor di personanan sin interes particular, cu ta desea pa sea asisti of alegra un individuo of grupo. Actonan di bondad spontaneo tambe por ta pa e reino animal y pa e ambiente natural.

 

Segun investigacion, tin numeroso beneficio cientifico cu ta practica di actonan di bondad spontaneo. Esaki ta inclui reduccion di dolo, stress di ansiedad y presion halto.

E ta aumenta hormona di amor, alegria, largura di bida, placer y serotonin.

De hecho, haci actonan di bondad spontaneo, ta contribui na e Meta Mundial pa Desaroyo Sostenibel no. 3: ‘Bon salud y bienestar’.

Mas ainda, esaki tin un conexion cu e tema di e Dia Internacional di Trabou Social 2017, p. e. “Promove Sostenibilidad di Comunidad y Medioambiental”.

Pa medio di actonan di bondad spontaneo, nos por sigui traha na nos comunidad Arubano cu ta bon conoci pa su hospitalidad, amabilidad y medio ambiente limpi.

 

Algun ehempel di actonan di bondad spontaneo ta inclui habri porta pa un hende, laga hende pasa bo dilanti den fila na banco, duna un colega un compliment pa un trabou bon haci, duna un otro chauffeur bo espacio di parkeo, permiti un hende crusa caminda, cana cu e cacho di bo bisiña, paga e comestibles pa un hende na caha, treat un amigo pa bay pelicula sin ningun motibo particular, bisa bo famia cuanto bo ta aprecia nan y smile hopi. Bondad tambe ta nifica uza palabranan cariñoso manera danki, mi ta despensa bo, ta compasiona, cariñoso, gentil, amabel, amistoso y generoso.

Laga nos tur fortalece e sentimento di pertenece na nos comunidad y duna un sentido di proposito mas grandi na nos bida segun nos ta trata pa laga e planeta miho cu nos a hay’e pa nos siguiente generacion.

Top