Dia Mundial di Awa 22 di maart: Awa Residual

En conexion cu dia Mundial di Awa, Departamento di Salud Publico conhuntamente cu DOW (Departamento di Obranan Publico) su seccion di RWZI kier pone atencion rib’e importancia cu awa tin den nos bida diario.
Tur aña riba ‘Dia Mundial di Awa’ ta enfoca riba un topico. Pa e aña aki esaki ta awa residual y e campaña di conscientisacion “Pakico awa residual?” ta pa reduci y re-uza awa residual den un forma eficiente y optimal. Awa residual ta tur awa cu no ta limpi esta, contamina.

E por origina for di diferente fuente di sector residencial, industrial of comercial.

Obhetivo di e campaña aki ta pa elimina/reduci contaminacion di e awa prome cu e awa bay bek den medio ambiente. E proceso aki ta tuma luga pa medio di micro organismo (bacteria).

 

E plantanan di RWZI ta procesa mas o menos 10 miyon liter di awa pa dia.

Awa procesa for di RWZI Bubali ta wordo uza pa irigacion di e tereno di golf na Divi Links y Tierra Del Sol, e restante ta bay den Bubali Plas pa percura cu esaki semper tin awa y pa garantisa e bienestar di e bida ecologico na e sitio. Awa procesa for di RWZI Parkietenbos y Zeewijk ta wordo uza pa irigacion di diferente plantacion publico na Aruba y tambe pa nos cunukeronan. Departamento di Agricultura, Cria y Pesca ta responsabel pa transporte di e awa procesa pa e cunukeronan.

 

Un di e tareanan di DVG y DOW ta haci diferente analisis di e awa procesa. DOW tin e tarea pa analisa e parti kimico y DVG e parti di micro organismo (bacteria). E resultado ta wordo midi a base di norma internacional.

 

Tanto DVG como DOW ta pidi cooperacion di comunidad pa no tira vet den pos, tampoco azeta di cushina of motor, grease, resto di cuminda, remedi, saco di plastic, baby wipes, producto kimico p. e. verf, terpentina, acido, gasolin etc. Tur esaki ta haci e chens mas grandi pa blokea e tubonan di pos na cas, esun di RWZI y tambe causa daño na e sistema di riool cu na su turno lo causa tardansa den e proceso pa purifica e awa. Purificacion di awa ta costa placa y energia. No cumplimento ta daña nos medio ambiente inecesariamente. Mundialmente ta conoci cu 80% di awa residual genera dor di comunidad ta regresa den e ecosistema sin cu e ta wordo trata of re-uza. Esaki ta e caso tambe na Aruba, p. e. na cas awa di baño ta bay pa e matanan sea directamente of via septic tank.

 

Mirando e desaroyonan mundialmente riba maneho di awa residual Departamento di Salud Publico conhuntamente cu DOW tin e retonan hopi importante pa yuda pais Aruba cu inovacion y sostenibilidad riba tereno di maneho di awa residual. Cada cuidadano por yuda cu esaki.

Pa mas informacion por yama ‘Dienst Warenkeuring en Hygiene’ na Departamento di Salud Publico, telefon 5224200.

Top