Dia Mundial di Riñon: Tene bo riñonnan saludabel

IBiSA conhuntamente cu Departamento di Salud ta uni p’asina duna algun informacion y tips pa tene nos riñonnan saludabel.

Aki ta sigui 5 tips simpel con nos por yuda nos riñonnan pa keda saludabel.

 

Hidrata bo mes bon; Bebe suficiente likido (sin sucu), preferibelmente awa. Esaki ta yuda bo riñonan funciona bon.

Bo urina mester ta di un color cla. Si e ta hopi scur esaki por ta un señal di deshidratacion. Recomendacion ta pa bebe por lo menos 7-8 glas di awa pa dia.

Ora di haci actividad fisico ta recomendabel pa bebe mas likido pa recompensa e likido perdi dor di sodamento.

 

Come saludabel; Un alimentacion balansa t’e seguransa cu bo ta haya tur nutriente cu bo curpa mester. Come 2 fruta y por lo menos 2 cup di berdura pa dia.

Haci suficiente uzo di grano completo manera pan of pasta volkoren/bruin. No agrega mucho salo den bo cuminda.

Pa mas informacion tocante un alimentacion saludabel por tuma contacto cu IBiSA (582-4987).

 

Controla bo presion di sanger regularmente; Bo presion di sanger por ta halto sin cu bo ta sinti’e y e ta haci daño na bo riñon, curason y adernan.

Test di presion ta simpel, liher y sin dolor y por wordo haci serca bo dokter di cas, na diferente botica, Wit Gele Kruis y tambe riba Bus di Salud.

Pa mas informacion tocante di e salidanan di Bus di Salud den bario por tuma contacto cu IBiSA.

 

No huma y bebe alcohol di mas; Si bo ta huma stop! Tin hopi beneficio pa stop di huma. Si bo ta bebe alcohol purba mantene na maximo 2 porcion pa dia pa hende homber y 1 porcion pa dia pa hende muher.

Un porcion ta 1 glas di 8 oz di cerbes of un shot di bebida sterki. Humamento y bebemento di mas ta hisa e presion di sanger. Presion halto ta un di e causantenen mas comun di fayo di e riñonan.

 

Mantene un peso saludabel; Peso di mas por aumenta e presion di sanger, cual ta malo p’e riñonan. Purba mantene un peso saludabel pa bo haltura dor di keda activo y come cuminda saludabel.

Haci actividad fisico por lo menos 30 minuut pa dia pa mantene un bon salud. Si bo kier/mester baha di peso anto tin cu haci actividad fisico durante 60 minuut pa dia, por lo menos 5 dia pa siman.

 

Riñon ta vital pa mantencion di nos salud, p’esey ta importante pa cuida nan bon.

Pa mas informacion por tuma contacto libremente cu IBiSA(582-4987) of Departamento di Salud Publico (582-4200).

Top