Dia Mundial di Salud cu enfoke riba Salud Mental

Rond mundo dia 7 di april ta celebra Dia Mundial di Salud. Na Aruba Plataforma Promocion di Salud, den cual tin representacion di Departamento di Salud Publico, IMSAN, WGK, IBiSA, hospital, SVB, AZV y un dokter di cas, tambe ta pone atencion riba e dia aki.

E dia aki ta brinda Plataforma Promocion di Salud e oportunidad pa trece conscientisacion riba un tema specifico. Tema di e aña aki ta trata di “Depresion, Ban papia”.

Depresion ta un malesa na unda e sentimento di tristesa ta dura un tempo largo of cu tin perdida di interes den e actividadnan cu bo tabata disfruta di nan. Ora e sintomanan aki ta dura mas cu 2 siman por papia di un depresion.

 

Otro sintoma cu tambe ta presenta ta un sentimento di bashi of tristesa inmenso, sentimento di culpabilidad, sin balor propio, problema pa concentra, memorisa of tuma decision, cambio den habito di comemento cu consecuencia cu bo ta nota cambio den bo peso, sentimento di desesperacion of ta sinti cu no tin speransa, sinti cansa, haci ta poco poco sin energia y sin motivacion.

Tambe ta presenta problemanan pa pega soño of drumi di mas, problema pa keda drumi, haya malbeis lihe of ta irita, deseo pa ta bo so. Cu otro palabra depresion ta duna sintoma, mas bien un señal cu bo salud mental no ta den balansa.

E ambiente familiar, social of trabou por ta un rason pa conduci na depresion. Of e causante por ta un malesa cronico Esaki ta nifica cu depresion por afecta tur hende sin importa edad, rasa of religion. Depresion ta causa cu e persona no por realisa su tareanan diario cu consecuenia cu e relacion entre famia, amigo y coleganan ta keda afecta.

 

Den caso extremo depresion por hasta conduci cu e persona ta comete suicidio. Na Aruba tambe tin un cantidad di persona cu ta sufri di depresion. No tur ora depresion ta bira un malesa. Depresion por ta un simple señal cu un persona no ta funciona bon na trabou of na cas of ceno social. Depresion por wordo preveni y trata si e persona busca ayudo trempan. P’esey ta importante pa educa nos mes riba e tema di ‘Depresion’, kico e ta, con pa reconoc’e, kico por haci pa preveni y con pa trat’e. No laga depresion bira un monster, papiando mas rib’e tema aki lo kita depresion for di e esfera taboe cu ainda e ta aden.

 

Diferente organisacion miembro di Plataforma Promocion di Salud ta organisa actividad relaciona cu Dia Mundial di Salud. Mayoria di e actividadnan aki ta interno dirigi riba nan mesun empeadonan. Asina aki Departamanto di Salud Publico ta ofrece na su empleadonan un ciclo di charla relaciona cu depresion.

 

Pa mas informacion relaciona cu e tema di depresion por yama Departamento di Salud Publico, Seccion Social Psikiatrico, tel. 5224200.

Leave a Reply

Top